Polis a bolbe detene e sospechoso C. S. den e investigacion di e tiroteo fatal cu a tuma lugar dia 22 di juli 2026 na Santa Cruz, caminda e hoben Rayshon Kelly di 16 aña a perde su bida. E sospechoso tabata deteni anteriormente den e mesun investigacion, pero a ser laga den libertad Segun Ministerio Publico, desaroyonan nobo den e investigacion a duna motibo pa detene di nobo.
E tiroteo a tuma lugar banda di veld di Winston, den cercania di Stadion Nadi Croes/Crismo Angela na Santa Cruz. Despues di e incidente, Polis y Ministerio Publico a inicia un investigacion cu a resulta den varios detencion.
Den e prome fase di e investigacion, un total di shete persona a ser deteni. Segun e informacion mas reciente di Ministerio Publico, actualmente tres sospechoso ta deteni ainda den conexion cu e caso.
Autoridadnan ta sigui cu e investigacion pa determina e circunstancianan rond di e tiroteo y e posible rol di e diferente sospechosonan. Ministerio Publico no a duna mas detaye tocante e desaroyonan nobo cu a conduci na e detencion di C. S.
