‘Evaluando pa wak con hopi realmente por conta cu Citgo pa otro aña’

Diamars despues di sali for di un reunion regular cu gobernador di Aruba, prome minister Evelyn Wever-Croes(MEP) a toca un poco riba e situacion di financiamento di Citgo y pa kico esaki ta haci e buraco financiero mas grandi.

Pa loke ta e parti di placa di Citgo mes, segun ex mandatarionan envolvi den hopi di e asuntonan di Citgo por ehempel na december e 60 of 70 miyon lo mester wordo paga.  Prome minister Wever-Croes ta bisa cu nan tambe a keda conta riba e placa aki di Citgo cual ta algo cu a keda informa desde tempo cu a inicia cu formacion di gobierno nobo. Sinembargo aworaki nan mas y mas e ta birando cla cu e placa aki no ta bay drenta mas segun e mandatario. “Pa varios motibonan e no ta bay drenta mas pero e motibo principal ta esaki: RDA(Refineria di Aruba) mester paga e suma aki na gobierno. Nan no tin e placa y kier a fia esaki. Esaki tabata andando pero na momento cu topnan di Citgo a keda deteni, esaki ta para.”

Trabao supervision
Como mandatario encarga di Energia, sra. Wever-Croes ta na altura di tur cos cu ta pasando na Citgo pero e ta bisa cu e no por comenta facilmente riba tur cos.
Pero: “RDA akinan mes ta haci e trabao di supervion pa gobierno. Citgo ta cumpliendo cu algun di e trabaonan  cu semper nan a bisa nan ta haciendo, mas low profile. E mandatario ta bisa cu no tin hopi hende trahando pero tin toch hende tur dia eynan y trabaonan no a para pasobra e topnan a keda deteni. Pero e mandatario a subraya cu ta yega un momento si cu nan lo mester bay sinta cu nan.
Ta haciendo un evaluacion na momentonan aki pa mira con hopi gobierno por bay conta cu Citgo otro aña realmente.

Detencion di dirigentenan a stroba
RDA por fia e placa pero e ora con nan lo paga esaki bek si e refineria no ta draai.
Banco ta bisa cu pa e refineria draai, Citgo tin cu draai e. Awo Citgo su topnan a keda deteni algun siman pasa y no tin un banco na mundo cu lo duna e compania awo un prestamo segun premier Wever-Croes. Pues esaki ta e motibo pa kico awo e placa aki no ta drentando y ta haci e buraco financiero mas grandi. E deficit a base di djis operacion tabata 50 miyon florin, anto tabata bin e ora acerca 50 pa 70 miyon di Citgo cu ta algo cu ningun hende por a premira pero cual a bira un situacion hopi delicado na momentonan aki, segun premier a comenta.

25juni, Jm, CITGO.jpg
Menos coordinador pa spaar placa
Awor cu tin un gobernacion nobo tin basta reaccion riba cosnan cu a wordo menciona prome cu eleccion manera bahamento di edad di pensioen, cu lo baha minister y lo spaar hopi miyones. “E rebaho di edad di pensioen ta sigui ta un compromiso di nos. Y nos a palabra den cuadro di formacion cu nos lo institui un comision pa nos weita na ki forma nos ta bay haci e. Pasobra partido POR tabata tin otro vision por ehempel bah’e te na 60.”

Pero e mandatario ta bisa cu ta laga esaki flexibel por ehempel pa esun cu lo kier sigui pa e bira kisas pa 62 aña. Pero cu e ta bay baha, esey ta definitivo.  Premier ta bisa cu nan ta trahando hopi riba spaar placa riba e presupuesto mes pa loke ta trata e gastonan. Por ehempel su ministerio mes no lo tin mas cu 12 hende trahando como coordinador/consehero den staff, den comparacion cu prome minister anterior cu tabata tin 120. E otro ministernan tambe lo haci mescos a pesar cu algun toch tin mas cartera y lo mester cierto cantidad di hende. Pero e no ta bay ta e cantidad anterior y esaki ta bay yuda den algo asina e premier a enfatisa.

Contract pa huur edificio
Un cos cu a wordo uza contra prome minister Wever-Croes politicamente ocho aña largo segun e ta bisa, ta e asunto di huurmento di edificio. “Mi a propone y compromete mi mes como minister president cu mi no ta bay huur ningun edificio. Awor mi ta sinta cu cuater contract di huur cu ex minister Mike Eman tabata huur den diferente localidad akinan na Aruba. Mi no por kibra nan pasobra  nan ta asina hinca den otro cu si kibra nan, mester bay corte y paga henter e suma.”

Aworaki su conseheronan ta mirando pa wak con lo kibra e contractnan aki pasobra e luganan ta bashi y no tin ningun hende den nan. Un di nan ta caminda Bureau Innovatie tabata situa cual no ta existi mas y nunca a existi. Nunca el a wordo lanta na un forma legalmente bon segun premier Wever-Croes. E trahadonan tur tabata disponibel tanten cu e gabinete tey, y net na ultimo a purba pa haci tur ambtenaar. Pero esey no ta valido pasobra e ta un decision demisionario.

E otro ta Bo Bario unda cu un rato prome cu gobierno anterior a baha nan a core institui e departamento anto e hendenan tambe tur tabata coordinador durante existencia di e gabinete.  Tin e graphic designer nan cu tabata rond di ex prome minister Eman cu tabata tin un otro luga cu tambe ta bashi.

“Nos ta bay logra e rebaho di gastonan aki por medio di tur e diferente medidanan cu nos ta bay tuma.”

 

 

 

 

 

You May Also Like

Apertura di lab y museo di cultivo di microalgae

Durante un ceremonia riba tereno di Refineria di Aruba a tuma luga apertura di ...

Gobernador di Guajira lo realisa bishita di trabou na Aruba

Entrante otro siman, Gobernador di Guajira (Colombia) Wielder Guerra lo ta realisando un bishita ...

Chauffeur a subi un borchi anto kibra esaki den dos

Riba e caminda di Cero Cristal diabierna merdia chauffeur di un tercel riba un ...

Bon Dia Aruba celebrando 25.JPG

Bon Dia Aruba celebrando 25 aña

“Nunca mi lo a pensa cu mi lo keda traha aki asina hopi tempo. ...

PIC 3 FHMD (1).JPG

FHMD: Campaña Orange Aruba pa bringa violencia domestico contra hende muhe

—  Un campaña nobo cu e nomber Orange Aruba a wordo lansa pa Fundacion ...

IMG_6346.JPG

Homber a bira basta mal den e parkeer plaats na Taco Bell

Dialuna anochi den e parkeer plaats di Taco Bell na Santa Cruz ambulance a ...