ORANJESTAD – Durante e prome bishita cu premier Hulandes, Mark Rutte, a realisa recientemente na Aruba, a wordo trata diferente topico riba e crisis migratorio Venezolano.

Tocante e parti specifico di un intervencion militar, con esaki lo por afecta nos turismo, Rutte a enfatisa cu esaki ta un tema pa su colega di defensa. Ademas, el a laga sa cu riba tereno di defensa, Aruba tin palabracionnan haci, segun nos prome mandatario, Evelyn Wever-Croes.

“Esaki ta un plan di alerta cu nos ta aden”, segun premier Wever-Croes.

Intermediacion
E mandatario local a contesta na Bon Dia Aruba cu di parti di Venezuela, absolutamente nan no a pidi gobierno di Aruba pa tin un rol di intermediacion pa atende cu Reino Hulandes e situacion actual. Nos prome mandatario a bisa claramente cu e no ta kere cu Aruba por hunga un rol asina, mirando cu asunto di relacion exterior ta un responsabilidad di Reino.

Si eventualmente un solicitud di e caliber aki ta drenta, esaki ta un asunto cu mester wordo delibera na nivel di Reino. E sa cu canciyer Arreaza di Venezuela tin un linea di comunicacion habri cu e canciyer di Reino, Stef Blok. E no ta kere cu Venezuela ta bin bati na porta di Aruba, considerando cu tin e linea di comunicacion directo aki cu Blok. E ta spera cu e situacion actual no lo escala asina leu, y cu sentido comun lo por prevalece, y cu pais Venezuela por sali for di e situacion cu nan ta aden di un manera pacifico. “Sinembargo, nos sa cu e realidad por ta diferente, y nos ta prepara p’e,” el a bisa.

Ceramento di frontera
Di otro banda, Wever-Croes ta haya cu si gobierno di Venezuela ta dicidi di cera su frontera atrobe, esaki no lo tin e mesun impacto cu ora esaki a sosode un aña pasa.

E mandatario a declara cu te aworaki no tin niun indicacion cu algo lo cambia riba situacion di nos frontera cu e pais bisiña di Venezuela. Tampoco nan no tin niun tipo di indicacion cu lo bin un tipo di represalia contra nos isla, mirando cu Reino no a reconoce Nicolas Maduro como presidente di Venezuela. Sinembargo, gobierno di Aruba constantemente ta monitor e situacion aki.

E tin cu bisa si cu ceramento di frontera na januari di aña pasa a siña nos un les como pais. E situacion a siña Aruba forsosamente pa busca otro alternativanan comercial pa abastece nos mes di cierto productonan, muy specialmente fruta y berdura. Segun e prome mandatario, for di cu e frontera a habri bek, e cantidad di barco chikito cu tabata bin antes a mengua substancialmente. E dependencia pa abastece nos mes di productonan Venezolano a baha hopi mes, ya cu Aruba forsosamente mester a busca otro paisnan mas stabiel pa abastece nos.

“Si aworaki e fronteranan mester cera, mi no ta kere cu e impacto cerca Aruba ta bay ta asina dificil manera aña pasa,” segun Wever-Croes.