Ayera atardi varios medio di comunicacion local a informa comunidad cu hues comisario a suspende detencion di ex-minister Otmar Oduber y el a recobra su libertad back.
Na momento cu Oduber a sali for di KIA despues cu a keda deteni pa 10 dia, varios medio di comunicacion, su abogado Vito Carlo, amigonan, familiar y su pareha tabata presente unda el a sigura cu no por duna mucho detaye, bisando cu su abogado ta e persona encarga di duna mas informacion.
Cu su yiu homber na banda, Oduber a expresa na e website Aruba Native cu “manera m’a bisa, berdad semper ta vence maldad, mi yiu homber ta un cu a wordo persigui y mi tin cu bisa cu esaki danki na periodismonan cu ta tuma luga cu shisheria, periodistanan cu ta purba plama cosnan pero cu na caminda manera ma bisa, berdad semper ta alcansa e mentira”.
Ademas, el a expresa cu e dianan cera den KIA “tabata hopi duro” y cu e lo sigui coopera na e investigacion.
Oduber ta e sospechoso principal di e caso penal “Flamingo”, e ta wordo sospecha di comete shete delito: falsificacion di documentonan, estafa, aceptacion di soborno, mal uso di su funcion como minister, participacion den un organisacion criminal, labamento di placa y onverklaarbare vermogensverhoging loke ta nifica cu ex-minister Oduber no por a duna un splicacion legitimo pakico y con su posicion financiero a mehora.
