Varios sindicato ta convoca comunidad pa asisti na ‘Marcha di Pueblo’ diamars 24 di mei

SIMAR, SEPPA, SPA, SADA, STA y OPPA ta sigui mustra nan mal contento cu diferente punto y a dicidi di convoca un marcha pa diamars awor 24 di mei unda cu nan lo cana den un marcha pasivo y silencioso den direccion Bestuurkantoor.

Edward Maduro presidente di Sindicato di Aduana (SADA) a expresa cu nan como sindicatonan preocupa cu e situacion den su totalidad a dicidi di yama na e marcha aki pa asina ey mustra e “mal contento y tristeza cu ta bibando no solamente e miembronan directo di sindicatonan, pero tur hende cu di un of otro manera ta wordo afecta door di e miembronan y door di e situacion”, el a bisa.

Nan ta yamel’e e ‘Marcha di Pueblo’ pa motibo cu nan ta considera cu tur hende ta wordo afecta, di e forma ey nan ta bay mustra nan tristeza di lo cual ta pasando na Aruba na e momentonan aki, segun Maduro a confirma.

“Nos ta yama un y tur cu ta sinti su mes afecta of yama, mirando e situacion cu nos ta bibando aden pa yega diamars awor pa 3or di atardi na Ex- DOW”, el a señala.

Tambe, el a afirma cu pueblo mes sa kico ta pasando, cu nan no mester duna detayenan di kico ta bin sosodiendo unda cu segun el a sigura “e ta hopi mas amplio y hopi mas grandi di lo cual algun hende ta bin comenta”.

Esaki no ta dirigi solamente pa empleadonan publico, semi-publico y sindicatonan, Maduro a bisa cu esaki ta bay hopi mas leu y ta p’esey cu nan ta keda referi na e pueblo di Aruba, unda cu aworaki ta bay ta e oportunidad pa comunidad demostra lo cual ta sinti “nos tin un gobierno cu a bin propaganda cu hende ta central pero nos no por wak con nos por bisa con e hende ta central”, Maduro a comenta.

Desde cu nan a tuma nota cu secretario di estado di Hulanda, sra Alexandra van Huffelen lo bin Aruba proximamente, nan a manda un carta pidiendo audiencia un biaha mas pa asina e sindicatonan aki tambe lo reuni cune pa informa kico ta sosodiendo y kico nan ta experenciando. Ya caba nan a reuni cu secretario di estado den un ocasion, unda cu sindicatonan a sinta cune na VNO algun lunanan pasa.

Ademas, el a señala cu semper lo tin hendenan cu ta purba desacreditanan, sindicatonan cu ta para pa nan miembronan y pueblo en general “nos tin cu refuta tur e acusacionnan falso contra sindicatonan cu nos tin un of otro agenda, mi ta kere cu nos ta bin ta wak esaki pa hopi tempo caba, nos como representantenan, director di trahadonan ta wak cu nos ta wordo trapa dia aden y dia afo, derechonan ta wordo trapa, nos no ta wordo scucha, nos no tin ni un hende pa acudi na dje y esaki ta bay ta e momento oportuno pa tur hende, no tin miedo, sali y bin” el a afirma.

Maduro a enfatisa cu nan no ta sinta cu Gobierno di Aruba pa motibo cu “unabes cu bo ta sinta cu gobierno y cu gobierno sa bon cla kico nos ta bibando, mi ta haya un falta di respet cu na januari cu nos a sinta cu gobierno cu nos a scucha di nan y cu desde e tempo ey nos no a scucha nada mas, aworaki cu de repenti nos a bisa cu nos ta bay haci un marcha, minister presidente a saca un comunicado ayera pa duna un par di informacion, pa nos ta un falta di respet”, Maduro a expresa.

Di esaki, el a trece dilanti e pregunta: pakico gobierno no ta duna atencion na e trahado?

Di mesun manera, ayera prome minister den un comunicado a duna di conoce cu el a yega na acuerdo cu Hulanda pa stop e cortamento di salario. Esaki despues di negociacionnan cu Hulanda, ayera mainta secretario di estado Alexandra van Huffelen a bay di acuerdo pa Gobierno di Aruba stop e recorte, bao di 3 condicion:

1. E ley di Wever-croes-norm of asina yama LNT mester ta na vigor. E ley aki ta den e fase final di tratamento den parlamento y lo wordo trata pronto.

2. E gastonan adicional mester sali di e propio presupuesto pasobra Hulanda lo no duna sosten di likides pa e gastonan aki. Manera ta conoci Gobierno di Aruba a incorpora e gastonan aki den e presupuesto di 2022 pa paga e 5% back den di dos mita di aña.

3. E recorte di 25% di salario di politiconan lo keda. Prome minister Evelyn Wever-Croes anteriormente a bisa caba cu si politiconan mester sigui corta cu 25%, nan lo haci’e, basta cu empleadonan di sector publico y semi-publico si haya nan salario back.

Tocante e punto aki, Maduro a enfatisa cu nan no ta confia den esaki “pasobra tanten cu no tin hechos, nos no por confia den palabra” el a finalisa.

Manera ta conoci, Gobierno di Aruba a entama un caso contra SIMAR unda cu den sentencia tabatin un par di punto cu Josephine Albertus, su presidente a splica caminda el a sigura cu “nan kier silencia nos por completo cu nos no por sali mas pa haci ningun accion, nos por bisa cu hues a bari esey for di mesa”.

Otro punto cu nan tambe a trece dilanti ta pa traha un ora menos pa dia y esey no tabata por, manera Albertus a afirma, “ora cu nos a haya e sentencia back e ta bisa cu nos no por traha e ora menos pa dia y cu nos no por sali y exigi pa kita per direct e 12.6%, den e veredicto di e articulo 8 ta skirbi cu bo mag di sali y mustra bo mal contento, esey ta e derecho cu cada ciudadano tin”, el a indica.

Esey ta nifica cu nan por organisa e marcha aki y cu no tin relacion cu e topico di reduccion di salario di 12,6%, “esey no ta cuadra cu realidad, e flyer di e marcha ta indica cu pueblo den totalidad ta cansa y nos ta marcha otro siman pasobra Gabinete Wever-Croes 1 y 2 a campaña cu ser humano ta central y nos como lider sindical nos no ta mira unda e ser humano ta keda central”, Albertus a enfatisa.

Sinembargo, Magaly Brito a sigura cu e recorte di salario di 12.6% ta sigui keda un problema y un preocupacion di esunnan cu ta emplea pa gobierno y esunnan di empresanan estatal, “e ta hopi cla, e ta un dolor y e hecho cu tin un sentencia cu nos por debati y interprete, no ta kita afo cu e hendenan ey, e trahado ey tin e dolor akinan, e no ta un victoria pa sindicatonan y tampoco pa un dunado di trabou cu na su momento a haya ta bon di negocia cu salario di trahadonan, pa mishi den cartera di hende sin tene cuenta cu su derechonan y cu ni sikiera a puntr’e, esey ta un tema cu sigur ta forma parti di e preocupacionnan cu tin pero na e momentonan aki e punto principal di sindicatonan SIMAR, SEPPA, SPA, SADA, STA y OPPA ta keda cu e desaroyonan cu ta andando na Aruba”, Brito a expresa.