Ex-presidente di parlamento di Venezuela Henry Ramos Allup, lo ta e candidato cu partido Accion Democratica lo bay presenta den un posibel proceso di eleccion primario presidencial, asina Negal Morales, sub- secretario di e partido a confirma.
“Nos a pone e nomber di Henry, cu ta e lider di Accion Democratica riba caya, pero nos ta sigur cu e forsa di Mesa di Unidad Democratico lo duna un cambio na Venezuela”, Morales a bisa. Morales a declara cu e partido ta propone Ramos Allup pasobra e ta un politico cu hopi experiencia” parlamentario na Venezuela, “ cu hopi experiencia den gestion publico y cu hopi forsa”.
“Nos ta pensa cu mester hiba pa presidencia di Venezuela un persona cu experiencia politico, cu conoce gestion publico, cu forsa, nos a propone Henry pasobra e gobierno cu ta bin, lo ta un gobierno cu mester enfrenta un momento hopi dificil pa Venezuela,”, a indica. Mesa di Unidad no lo bay dividi pa motibo di candidatura cu cada partido a presenta, pasobra den cada partido, nan lo haci un proceso di eleccion primario, y asina por defini un candidato unico, y cu un plan unico pa e pais.
Sub-secretario regional di AD a papia tocante proceso di validacion di su partido, cu mester keda realisa 25 y 26 di maart. El a mustra hopi confiansa pa e posibilidad di legitima e partido ey na tur estado di Venezuela. Eleccion presidencial na Venezuela mester tuma lugar na fin di aña 2018 y aunke ainda e proceso di eleccion di gobernador y alcalde ta pendiente, pasobra no tin calendario electoral, otro dos partido politico a comunica nan candidato presidencial.
Dialuna Primero Justicia a anuncia cu su candidato pa eleccion primario ta Henrique Capriles. Capriles a participa dos biaha como candidato pa presidencia di Venezuela. Voluntad Popular a anuncia cu su lider y fundador Leopoldo Lopez ta como candidato pa eleccion presidencial, a pesar cu e ta den prizon desde 2014 y cu e ta sinta un condena di 14 aña. E partidonan aki di oposicion a anuncia cu lo tin eleccion interno pa scoge candidato regional cu por presenta den un proceso di eleccion primario di oposicion.
