Oda na e Piscado ta un exhibicion cu ta bay tin su apertura pa dia 16 di juni na Fundacion Rancho na unda ta bay presenta e obranan di e artistanan visual local Samuel Sarmiento cu e curaduria di Ana Maria Hernandez.

E dia aki for di 7:00pm por bishita di un manera gratis Fundacion Rancho ubica na Visstraat 1, Oranjestad te cu dia 14 di augustus na unda e exhibicion ta bay ofrece un programa publico cu diferente actividad den luna di juni y juli 2023.

Oda na e Piscado ta un proyecto di investigacion, arte y comunidad den cual a recopila storianan y fragmentonan di un di e bisindarionan mas antiguo di nos isla: Rancho.

E proyecto ta enfoca riba e origen di Rancho como comunidad di piscado y e impacto di e desaroyonan social y ecologico riba e comunidad aki, e exhibicion ta ofrece na e bishitantenan e oportunidad di acerca nan mes na e storianan di e comunidad Ranchero y e tradicion di pesca local pa asina por profundisa e relacion cu un parti di herencia cultural.

A realisa Oda na e Piscado bao e curaduria di historiador di arte y gestor cultural Ana Maria Hernandez, e proyecto aki ta forma parti di Stichting Rancho su programa celebrando e 200 aña di Oranjestad na 2024. Oda na e Piscado ta un colaboracion cu Plataforma Aruba y a haya e sosten di Mondriaan Fund.

E proceso di investigacion aki ta inclui archivonan publico, literatura y material audiovisual, pero e componente cu nan ta considera mas importante ta e colaboracion cu e comunidad.

E proyecto ta finalisa cu un intervencion artistico di Samuel Sarmiento den e zomer di 2023, unda Sarmiento ta haci uso den su dibuho, pintura, y ceramica di literatura y tradicion oral di Caribe, lama, y su tradicionnan.

E propuesta di Sarmiento pa e colaboracion cu Fundacion Rancho ta presenta preguntanan esencial tocante e relacion cu e lama rond di nos isla, e balor di tradicionnan oral y e importancia di comunidad.

Nan meta cu e proyecto aki ta pa no solamente colecta, presenta y preserva material valioso tocante e piscado Arubiano y su tradicion di pesca local, nan tambe kier promove discusionnan rond di e tema di herencia cultural y importancia di su proteccion.

Na 2020, Fundacion Rancho a pidi Plataforma Aruba pa desaroya hunto cu artistanan local un serie di proyecto cu lo combina investigacion, arte y e comunidad di Aruba.