Dos siman pasa a tuma luga e inauguracion di Weganan Escolar (WE) Aruba 2023. Un total di 45 scol y mas di 1000 mucha ta competiendo den e diferente disciplina di deporte, incluyendo e categoria di baile cultural, na unda alumnonan di e diferente scolnan ta prepara un presentacion di baile y presenta esaki na publico y hurado pa e premio maximo.
Grupo di baile Kids & Youth in Action tambe ta den full preparacion pa participa den e competencia di baile cultural. Ariana Lake, coreografo y juffrouw encarga cu e presentacion ta conta Bon Dia Aruba con e preparacion ta bayendo y kico e ta spera pa dia 10 di juni.
“Preparacion ta bayendo hopi bon y nos ta bezig ta train duro y tur dia cu nos por train nos ta probecha pa train. Mi ta trahando hopi duro cu e muchanan y nan tambe ta dunando tur di nan banda pa e baile aki,” Lake a indica.
Pa loke ta e presentacion mes, manera e baile di e categoria ta bisa, ‘baile cultural’, e muchanan ta mester presenta un elemento di baile folklorico di Aruba. Pa Kids & Youth in Action, Lake ta conta cu nan ta preparando un mix di diferente cantica y mas cu claro e ta inclui e elemento di baile folklorico di Aruba.
Di su expectativanan, Lake ta splica cu e lo ta n hopi bon sentimento si nan logra gana cualkier premio, pero e meta principal cu e tin ta pa train e muchanan pa nan haci un bon presentacion y mas importante disfruta di e baile ariba escenario.
“Claro e ta bay ta hopi exciting si nos gana of si nos haya cualkier premio, pero pa mi mas importante ta pa e muchanan train duro y duna un bon presentacion cu nan, ami y nan mayornan por ta orguyoso, gana of perde y pa nan have fun tambe,” Lake a remarca.
E competencia di baile cultural ta tuma luga diasabra 10 di juni den Entertainment Center.
