ORANJESTAD – Den un conferencia di prensa, minister Rudy Lampe (RED) a anuncia di algun cambio y firma un acuerdo di cooperacion cu universidad na Nebraska, unda studiante di Aruba por paga un fee manera local.
Segun e mandatario a splica cu esaki ta haci posibel pa e studiante por haya oportunidad pa studia no solamente na Florida, pero awor na Nebraska, y ta ocupa ta negociando pa otro estado na Merca, unda cu e studiante por haci uzo di ‘Arubalening’, prestamo di Aruba, pa su estudio.
Mirando cu antes no tabata posibel, pasobra Directie Onderwijs ta djis duna un cierto cantidad di placa cu no ta yega pa studiante por tin 4 aña largo di estudio henter paga. “Nos ta busca pa habri oportunidad, no solamente pa nan por bay Hulanda, pero tambe Merca y Canada. Pa por ofrece un futuro diferente di locual nos conoce. Sigur un interes bou nos hobennan”, Lampe a splica.
Via e negociacion ta logrando cu nan por acepta studiante di Aruba como local, anto esey ta baha e gasto, unda cu e ta bira pagabel pa Aruba su lening, anto e por biba y studia na e pais. Pa locual ta trata di estudio, e persona mes ta dicidi di scoge ki profesion e kier pa su futuro.
A puntra e mandatario si e prestamo di estudio lo por bay pa cualkier estudio, of si tin cierto carera so, anto si e cantidad ta wordo paga henter, manera ta wordo haci cu Hulanda. E ta contesta cu e gran cambio ta cu e fee den periodo anterior tabata pa studiante internacional, y esey ta un fee mas halto cu esun local, anto pa e motibo aki tabata impagabel.
“Arubalening ta respeta escogencia di e studiante. Porta di berdad e ta scoge pa un profesion cu no tin na Aruba, pero ta parti di nos obligacion como gobierno si e persona aki ta haya trabou y un miho futuro na otro pais unda tin e necesidad di e profesion ey. E futuro di nos hobennan”, e mandatario a finalisa splica.
