Durante e desvelo di Plaza Comercio ubica na Columbusstraat, 20 di februari ultimo, a introduci un “tool” nobo cu lo fungi como un plataforma pa promove Oranjestad como e “next best place” pa experencia aki na Aruba, pa asina informa tur interesado kico tur loke Oranjestad tin di ofrece.
Via di un QR Code graba ariba e plakkaat na Plaza Comercio, por haya mas informacion di e.o. e nominadonan honra ariba e plaza aki. Esaki ta e prome paso pa yega na un plataforma cu lo mester promove tur actividad, negoshi, y duna un splicacion amplio di areanan y edificionan iconico y historico di nos centro di ciudad. Proximo paso ta pa colecta y centralisa tur informacion pa asina publica esakinan virtualmente pa tur cu ta interesa den bishita y conoce mas di nos centro di ciudad.
Sector priva lo haya presencia significativo pa por promove nan producto, of servicio manera cu nos ta custumbra di centro comercialnan rond mundo. E prome paso a wordo tuma y den e lunanan nos dilanti hunto cu tur comerciante den Oranjestad lo percura pa e website haya su contenido y presencia pa asina yuda promove Oranjestad comercialmente.
Nos tin cu crea otro areanan di recreo y asina diversifica producto Aruba“ Si nos sincronisa inversion y esfuersonan priva y publico nos ta eleva e potencial comercial di Oranjestad”. Oranjestad ta duna nos un oportunidad unico pa desaroya un area cu pa añas ta pasando den desafianan comercial . Alabes, e ta duna nos un oportunidad nobo pa crea desaroyo mas den harmonia cu nos calidad di bida como ciudadano, medio ambiente, y nos bishitantenan cu ta representa e pilar economico di nos Pais.
