Frank Arrindell ta un yiu di tera cu un stimacion grandi pa Aruba. Despues di basta aña cu el a bay biba afo den diferente pais, Frank a dicidi di bin bek su isla natal.

El a caba scol na Colegio Arubano tempo cu e tabata den barak na Maria College. Y unabes cu el a caba Colegio, el a dicidi di bandona nos isla. Pero manera e mes ta bisa: “Aunke mi a biba hopi aña afo, semper Aruba tabata den mi curason.” Pero tin un motibo mas cu tin di haci cu Frank su curason y cu Aruba. Frank su casa tambe ta Arubiano, pero tur dos ta di famia di isla ariba. Nan dos a nace na San Nicolas na Lago Hospital. “Ma bay busca mi lombrishi, pero nan a basha hospital abou. Mi no por haya mi lombrishi…” cu un gran sonrisa el a bisa.

Bin cas bek.
El a traha hopi aña afo na servicio di varios compania internacional di aviacion. Entre nan el a bay inicialmente na St. Maarten, unda el a biba ultimo tempo, caminda el a cuminsa traha cu Trens Caribbean na aña 1963. E tabata e prome step, ya cu Frank a biaha y traha rond mundo. Semper el a haya esaki un oportunidad ideal pa promove Aruba, pero tambe St. Maarten cu e ta considera como dos isla ruman. “Ora cu nos tin problema, Aruba semper ta bin yuda nos.”

Igualmente e ta reconoce cu tin hopi yiu di St. Maarten cu ta biba na Aruba y cu nan a yega di traha cu Lago. E ta haya cu e relacion entre e dos isla aki ta uno hopi bon.

Aunke pa basta aña e ta residencia na St. Maarten hunto cu su famia, semper e ta bishita Aruba por lo menos cada dos aña. Pero muy specialmente pa disfruta di su temporada di Carnaval. E biaha aki el a dicidi tira su anker bek na Aruba. “Mi kier descansa y gosa di loke mi a traha p’e.” Pero no solamente Frank sino principalmente su casa Carole Bernadine Smith-Arrindell, kende ta bisa: “Mi kier bay cas bek!.”

 

Mundo di aviacion.
Frank su baggage den mundo di aviacion ta uno grandi y pisa. El a traha cu Pan American. Tambe 25 aña cu Eastern Airlines y despues el a lanta su propio compania bou e nomber hopi subhetivo di Arridell Aviation Services na St. Maarten, unda e el a bin innovando riba tereno di aviacion priva. E ta un sector hopi activo den economia di St. Maarten, caminda dia 4 di januari ultimo nan tabatin entre 150 pa 160 jet priva. Mayoria di nan ta uza St. Maarten como parkeer y for di eynan nan ta move pa otro islanan bisiña.

Recientemente den cuadro di inicio di aña nobo 2020, Frank Arrindell a tene un encuentro placentero na Mulligan’s Restaurant cu un grupo di amigo y colega di e mundo di aviacion. “Aviacion ta loke ma haci henter mi bida,” el a bisa. Den e reunion aki a participa: Frank Arrindell ex Director Eastern Airlines; Eric Gumbs Gerente di United Airlines, Frank Bisslik ex gerente di Jet Blue Aruba; Jeannette Bisslik ex Gerente general Us Airways; Karen Hoo-Joubert ex Supervisor di Pan American World Airways y Eastern Airlines na St Maarten; Vera Olivacce supervisor di Caribair y Eastern Airlines na St Maarten; y Charlene Van der Linden ex Supervisor di Arridell Aviation na St Maarten y Country Manager di Delta Airlines na St Maarten; Steven Kong Gerente di Eastern Airlines na St Maarten y General Manager di Arrindell Aviation Services na St Maarten.

Cu orguyo y satisfaccion, Frank Arridell a laga sa cu den e grupo aki tabatin profesional cu tin entre 40 pa 50 aña di experiencia riba tereno di aviacion. Frank su bon intencion ta cu unabes cu e ta establece totalmente na Aruba denter di un par di luna, e kier pone su experiencia y conocemento na disponibilidad di gobierno y tambe di Oficina di Turismo di Aruba (ATA) pa sigui yuda promove Aruba den e ramo di turismo.

Bunita recuerdo.
E reunion cu nan a tene na Mulligan’s Restaurant tabata un iniciativa hunto cu Sr. Oslin Toppenberg, ken e ta considera no solamente su amigo, sino su ruman.

Nan ta conoce otro for di tempo di mucha, specialmente cu Oslin su ruman musico y guitarista di Trio Azteca, Etty Toppenberg. Un recuerdo cu Frank ta conserva tabata ora cu na aña 1971 el a casa na St. Maarten. E tabata un emocion grandi y un gran sorpresa ora cu el a mira Etty, Eric Escalona y Max Hassel di Trio Azteca den misa cantando ‘Ave Maria.’

A transcuri 56 aña caba cu Frank a bay biba afo y e ta hopi impresiona cu e adelanto cu Aruba a bin pasando aden den e ultimo añanan. “Mi ta hopi impresiona cu e adelanto. Cu e caminda nobo cu ta bay aeropuerto y tambe cu Watty Vos Boulevard,” el a bisa. Y a pesar cu Aruba tin su retonan, manera otro paisnan rond di nos, pero e ta haya cu akinan a lo menos bo ta mira algo. “Si a gasta placa, pero si bo ta mira algo p’e. Esey ta e impresion cu mi tin.”

Igualmente ta reina un ambiente positivo. E ta mira cu nos hendenan ta biba contento y feliz. E ta haya sin duda cu Aruba ta haci honor na su slogan di: One Happy Island. “Dushi Aruba, Aruba patria stima, kico mas mi por bisa bo,” asina Frank Arrindell cu un sonrisa riba su cara ta termina e entrevista aki.