Sindicato TOPA (Trahadornan Organisa di sector publico di Aruba) a comparti su opinion tocante e situacion na migracion, mirando cu na luna di december tabatin fila largo na migracion pa asina bishitante of persona local por a drenta Aruba.

Den dianan di fiesta ora avion tabata yega y mester pasa migracion, tabatin rij di 300 persona anto 4 persona so trahando na migracion. Presidente di sindicato Rene Bernabela a comparti e presion cu esnan di departamento tabata sinti.

TOPA a evalua henter e aspecto migratorio den temporada di december, ora cu a haya reclamo cu pasahero tabata warda oranan largo den rij na migracion. TOPA tabata den desacuerdo cu e situacion aki pa diferente motibo.

Bernabela ta bisa cu na prome luga e motibo di desacuerdo ta cu na final di aña pasa nan a duna declaracion encuanto e situacion den departamento di migracion. Nan e menciona e falta di personal; hende cu a bay cu vakantie, hende malo y otro caso cu a bin dilanti.

Nan a confronta minister di husticia, Andin Bikker (POR) cu e situacion, pa tene un reunion pa asina por wak kico gobierno ta bay haci cu e situacion. “Nan ta na altura y e situacion a keda mescos. A presenta e caso cu tabatin un 3.000 pasahero a yega na mesun ora y tabatin tres persona pa atende esaki.”

Sinembargo e ta bisa cu e critica aki no ta nada straño mirando cu ora compara cu esnan cu ta biaha pa Merca, nan tin cu pasa sala di migracion Mericano, y tambe ta wak cu tin dos oficial trahando pa atende 3.000 pasahero cu mester pasa cerca nan. Pero e ta remarca cu esey no ta caminda cu mester yega si mira e trato cu migracion Mericano ta duna.

Bernabela a felicita henter personal di migracion cu a traha den luna di december y cu a logra procesa tur hende pa asina nan por a yega nan destino despues di e proceso.

E ta bisa cu tur hende sa con e trabao di migracion ta hinca den otro. Cu e trabao aki no ta algo unda por tuma ken cu ta pa eherce e funcion. Al contrario ta persona specialisa y prepara pa haci e trabao mester y pa e motibo ey sindicato TOPA kier a felicita su miembronan pa nan trabao den luna di december.

Tambe Bernabela a bisa cu a tuma nota den medio di comunicacion cu minister Bikker lo a declara cu no ta confirma ainda, pero cu locual ta trata e falta di personal na migracion, a acerca conseho di minister y lo haya luz berde pa recluta personal nobo pa e departamento.

Sindicato no a haya confirmacion ainda, pero kier pa e mandatario duna di conoce si e noticia ta berdad. “Esey lo ta un alivio pa e personal di migracion mirando e scarsedad cu tin na e momentonan aki. Ademas nos sa di e aspecto pensioen unda cada aña lo tin mas hende cu ta bay y si no tin hende nobo, e situacion lo keda un caos.”

El a comenta tambe tocante e situacion di tension entre Merca y Iran, mirando cu Mericano ta biaha rond mundo y “Aruba no ta un excepcion.” Mester ta alerta pa e tension entre ambos pais mirando e consecuencia cu esaki por trece pa Aruba, ya cu turismo ta e unico pilar economico.

Tur e puntonan aki ta preocupacion cu sindicato TOPA tin pa e departamento di migracion. Tambe el a menciona cu e falta di material pa personal di migracion cu tambe a bay den deliberacion cu minister pa concretisa esaki. “Con cu ta material mester tin pa trahado por haci nan trabao.”

Tambe el a duna di conoce cu a pesar di e problema di poco personal, nan no a considera cu e ‘ happy flow’ tabata efectivo. Nan a ripara cu e sistema di happy flow tabatin tres mashin cu no tabata funciona durante e luna.

Nan a comparti e problema cu minister, ya cu nan ta haya cu no por kita persona na migracion y introduci e mashin di happy flow. Na algun momento cu e mashin no ta funciona mas, of coriente bay, anto mester ta alerta pa por atende e turistanan cu ta drenta, mirando tambe seguridad si algo asina pasa.

Un punto cu tambe mester tuma na cuenta ta e proyecto 2030 cu ta andando, mientras lo tin mas vuelo y cu planificacion lo ta un reto pa aeropuerto. “E expansion mester atende conhuntamente cu AAA, minister di turismo y minister di husticia, pa asina esaki funciona debidamente.”

Bernabela a bisa cu e ta contento cu e parti di reclutacion y opleiding ta cuminsa pasobra esey lo ta un alivio pa e departamento cu ta pasa henter aña bao presion.

 

LEAVE A REPLY

Please enter your comment!
Please enter your name here