Tanto na Hulanda, Merca, Puerto Rico y Aruba awor, ademas di tur otro pais cu ta haci uzo di e vacunanan di Moderna y Pfizer mester firma un asina yama waiver, esta un exencion, unda ta bay de acuerdo cu termino y condicionnan di e compania cu ta produci e vacuna.

E waiver aki a lanta hopi inkietud den comunidad.

Entre otro pa por ricibi e vacuna ta bay de acuerdo cu aplicacion pa e vacuna ta a base boluntario; e vacuna pa COVID-19 ta por nada; dokter di cas ta na altura di tur condicion medico y como tal, mester determina si e persona ta cualifica pa e vacuna.

Ademas, na momento di aplica pa e vacuna contra COVID-19, e sistema mes lo genera un cita y e di dos cita, tres siman despues di a ricibi e prome vacuna.

E pacient ademas ta bisa di ta compronde cu den caso cu e ta malo of ta experiencia sintomanan di COVID-19 no por ricibi e vacuna y lo mester traha un cita nobo.

Na Aruba, no por scoge e cua vacuna ni e luga unda ta ricibi e vacuna, ya cu esaki ta determina pa Departamento di Salud.

Controversia

Kizas e parti cu mas ta mustra un controversia, ta e parti di e condicionnan unda e pacient cu kier un vacuna ta duna aprobacion pa registra cu el a ricibi un vacuna y cu su datonan anonimo ta bira parti di e analisis di salud publico di DVG riba COVID-19.

Cualkier efecto secundario cu por experiencia lo keda raporta na autoridadnan cu despues lo manda e informacion aki na e asina yama ‘bijwerking cetrnum LAREB’ pa mas analisis. Lo tene e datonan aki pa 20 aña.

E persona cu ricibi e vacuna lo no tene Aruba, Gobierno di Aruba responsabel pa cualkier efecto secundario despues di a ricibi e vacuna contra COVID-19.

E consentimento aki no ta algo nobo den e mundo di remedi. Numa cu ta uza e tipo di waiver aki den e periodo di test, y ta basa riba uno unda e persona cu ta participa na e test ta bon informa di tur risico.

Segun e reglanan di FDA, un consentimento informa ta nifica cu ta percura cu e participante na e test ta ricibi informacion adecuado pa un decision informa riba participacion den un investigacion clinico. Tambe mester facilita e participante pa e por compronde e informacion. Mester tuma un tempo apropia pa haci pregunta, y discuti cu miembronan di famia y amigo, riba e protocol di investigacion y si e persona en cuestion mester participa na e test, si of no. Mester haya e acuerdo boluntario di e participante y tambe sigui duna informacion riba e progreso di e investigacion clinico of na momento cu e situacion ta rekeri esaki.

Pues e proceso mester duna e participante suficiente oportunidad pa considera si e ta participa si of no.

E lista di rekisito di FDA pa personanan cu ta participa na e test ta hopi extenso.

MRNA

Di otro banda, un fuente bon conoci na Bon Dia Aruba, cu experiencia den produccion internacional di remedi ta bisa cu e vacuna contra COVID-19, e asina yama MRNA vaccine, no ta uno cu ta completamente nobo. E MRNA tin hopi aña den investigacion y produccion. Locual si ta algo nobo, ta cu a ahusta e MRNA pa ataca e coronavirus y despues stimula e curpa pa traha anticurpa pa bringa COVID-19. “E waiver ta bin cu e vacunanan aki. E ta algo global. Motibo ta cu e ta un sistema nobo di vacuna. E bieunan ta consisti di virus zwak cu ta pone e curpa reacciona. E vacuna nobo no ta contene e virus. Sino un proteina cu ta busca y elimina e coronavirus y ta crea anticurpa pa bringa e virus. Pero, ta prome biaha cu ta uza e MRNA den curpa di hende.”

E testnan clinico a tuma luga y nan ta riba un escala relativamente chikito, si compara cu e populacion mundial. “Locual ta sosodiendo awor, ta cu ta bay continua cu e siguiente fase di estudio, cu ta pa midi e efecto a largo plaso,” e experto den mundo di farmacologia internacional a bisa Bon Dia Aruba. “Riba su mes, e resultadonan di e testnan na scala chikito a mustra un bon resultado, y cu pa hende cu no tin mucho problema inmunologico, e ta recomendabel pa tuma e vacuna. Pero realidad ta si, cu awor ta bay cuminza midi e efecto secundario a termino largo.”

Ya a paga pa e vacuna

E hecho cu ciudadanonan ta ricibi e vacunanan por nada no mester ta mira como un gesto di e companianan farmaceutico, segun e fuente na Bon Dia Aruba. “Merca, Europa a duna Moderna, y hasta Pfizer, y otronan, hopi placa pa bin cu e vacuna. Pero e trabou grandi pa yega na e vacuna MRNA no a cuminza na 2020. E ciencia MRNA ta conoci pa hopi tempo caba y locual e companianan a haci ta adapta e vacuna pa COVID-19. Tur e biyones cu a bay pa e companianan grandi aki tabata bou capa cu ta bay paga pa e proceso di desaroyo, pero e vacuna mes tabata t’ey. Por bisa cu ya caba e companianan aki a gana hopi placa caba,” ta locual e persona a bisa Bon Dia Aruba.

“Hopi universidad ta ricibi asina yama federal grants, esta subsidio cuantioso di gobiernonan pa desaroya remedinan nobo. E placa aki ta pa studiantenan di PhD cu mester crea tratamentonan nobo. E MRNA ta resultado di un subsidio asina aki. Tabata un pareha Aleman, cu pa medio di nan Universidad pa bin cu e tratamento contra un virus, cu ta nobo. Pues, ya caba a inverti den e proceso. Locual companianan farmaceutico ta haci, ta cumpra e derechonan riba e produccion y ta pone su prijs comosifuera ta nan a desaroya e tratamento, cu en realidad ta existi caba. Pues, e hecho cu a ricibi fondonan di Gobiernonan, ta e prijs cu normalmente e companianan aki lo cobra na consumidornan.” Segun e experto aki, cu tambe ta traha den e mundo aki, e interpretacion di etica di parti di e industria farmaceutico, no tur ora ta mesun interpretacion cu locual publico general ta asumi di ta etica.

Asina mes, su conseho ta pa tuma e vacuna. “E resultadonan preliminario ta hopi bon. Un persona cu no tin problema inmunologico, pues ta saludabel, ta core menos risico si e tuma e vacuna versus keda sin tuma. Pa otronan, ta bon pa sigui tuma e precaucionnan di higiena y keda pendiente pa e tratamentonan contra COVID-19, cu tambe ta bay subi mercado na 2021.”