Fundacion Anti Droga Aruba (FADA) a lansa su di dos temporada di documentarionan basa riba bida real.
Trahado preventivo di FADA, Cindy Lacle a informa cu e fundacion aki ta bezig cu e documentarionan aki. Despues di un aña cu a trece pa henter mundo hopi contratiempo, nan a dicidi di bin bek cu e proyecto aki, ya cu e tabatin un bon reaccion aña pasa.
E proposito di e serie di documentario aki ta pa nos comunidad conoce origen y factornan cu ta contribui cu un persona por cay den e uso di droga. Entre otro debi na factornan social, famia disfuncional, abuso sexual, tanto fisico como emocional. Tambe trauma, mala amistad of mala influencia cu ta entre otro factornan cu por contribui cu un persona cay den e tentacion di consumi droga y nan por cay den e gara di adiccion.
Despues di un reaccion positivo di nos comunidad nan a dicidi pa bin cu mas documentarionan, caminda bo ta presencia historia nan di diferente personanan cu a rehabilita di adiccion. Pero tambe personanan cu ainda ta den e lucha aki. Historia nan relaciona cu yiu di dera cu a cay encarcela den exterior y tambe famianan cu te awe ta sufri cu dolor e problema di adiccion di un di nan sernan keri.
Nan a cuminsa ayera cu e transmision di e dos temporada di e documentarionan via diferente canal di television, entre nan TeleAruba y tambe diferente social media. E lo wordo transmiti cada siman. E di dos lo wordo transmiti dia 10 di december y e di tres lo ta dia 17 di december pa cera aña 2017. Entrante otro aña nan lo bini cu mas episodio cu lo wordo informa debidamente.
Cada historia ta uno diferente y den e caso aki cada persona cu a bin cu su testimonio di bida padilanti a duna autorisacion pa e por conta y divulga publicamente su historia. Algun di nan a prefera di keda anonimo y FADA a respeta nan solicitud, y tambe elogia nan curashi di bin dilanti pa conta nan historia.
Pa FADA importante ta esencia di nan historia pa asina educa, informa y conscientisa nos comunidad pa yuda preveni e sorto di problema aki cu ta afecta tanto famia.
Lacle a bisa cu ta di remarca tambe cu cada un di e historia aki tin un efecto grandi riba salud mental. No solamente di e persona sino di esnan rond di dje, specialmente su famia, ser keri y amistadnan. Esunnan interesa por bishita nan pagina di Facebook: FADA Aruba, unda bo por wak libremente e documentario.
