FADA resultado siman cinta cora Br.jpg

Fundacion FADA ta biniendo cla cu su tradicional Siman di Cinta Cora. Juendel Sprok, director di FADA, a declara cu e siman ta culminando hopi bon ya cu siman aki nan tabatin nan actividad bisti na locura locual a surpasa nan expectativa, ya cu nan a dobla e cantidad di participante.

 

El a  bisa cu e siman aki door di e Siman di Bisti na Locura, FADA no a bay niun scol pa duna nan charlanan di conscientisacion. Pero e siman aki cu ta drentando te cu december nan ta full pa bay varios scol y hotelnan tambe. Intencion ta pa FADA por yega cu su mensahe di conscientisacion cerca e mayornan, ya cu no solamente mester educa e muchanan na scol, sino cu ora nan ta bay cas nan mayornan tin e toolnan necesario pa atende cu cualkier situacion cu nan yiunan.

 

Proyecto

Un topico cu ta resalta di FADA su charla cerca e muchanan di scol ta asunto di consumo di alcohol. Sr. Sprok ta haya cu e topico aki no ta uno facil den nos comunidad . Nos muchanan for di scol basico tin biaha ta experimenta cu alcohol, y nan pensamento ta cu e alcohol ta algo gewoon pa uza pa bo pasa pret, ya cu nan circulo familiar ta consumi alcohol.

“Pa nos ta importante pa educa nan riba e tipo di realidad riba uzo di alcohol, specialmente si bo ta cuminsa na un edad hopi jong”, el a bisa. Pa otro aña FADA lo bin cu un programa nobo cu ta bay yama: “Pasa pret sin alcohol” (E nomber di e proyecto aki ta: LOL zonder alcohol).

E ta un programa cu ta bay cuminsa como un proyecto piloto den shete scol basico, ya cu tin investigacion haci cu ta mustra cu ora un mucha ta pasa e brug pa scol secundario, eynan e espacio ta cu nan ta bay cuminsa uza of expande e uzo di alcohol cu no ta bon pa nan.

E ta un programa cu ta tuma 15 ora di les solamente tocante e topico di alcohol . Cu e proyecto aki FADA kier duna e muchanan y hobennan e toolnan necesario pa ora cu nan ta yega na e momento di prueba, nan ta bay scoge pa e parti positivo cu ta esun di abstene di uza alcohol.

 

Siman Cinta Cora

Dialuna awor tin e clausura di Siman di Cinta Cora y aunke e ta bayendo hopi bon, ainda FADA tin cinta cora na benta y tambe e mugnan cu e slogan: “Yolo Be Drug Free”.   E biaha aki tabata bisto e participacion di hopi scol te hasta  hopi kleuter y scol basico cu e envolvimento no solamente di e muchanan sino di e docentenan tambe. Varios compania a uni na e campaña aki y e “reaccion ta hopi positivo”, Sr. Sprok a bisa.  E ta haya esaki mas positivo ya cu tras di e campaña aki, FADA ta trece su mensahe di keda leu for di droga.

Director di FADA a bisa cu e nomber “Yolo” ta conoci den e ambiente di nos hubentud caba, pero nan a bin cu un toke mas positivo di e nomber aki. Tur hende cu a participa di e campaña Bisti na Locura, bo por manda libremente bo potret di bo grupo of di bo  cas y share riba e Facebook di FADA. Asina bo por participa na varios premio te dialuna awor.

Sr. Sprok a indica cu e idea di e siman  di bisti na locura ta pa nos comunidad completo por participa di un manera creativo pa bisa cu nan ta contra di e uzo y mal uzo di cualkier substancia legal y ilegal na Aruba.

 

LEAVE A REPLY

Please enter your comment!
Please enter your name here