10aruba147 (1).JPG

Dia 2 di november, ta un fecha cu religion Catolico a señala pa recorda Dia di Tur Difunto, y ya caba e preparacionnan pa haci limpi e santananan rond di Aruba a cuminsa, entre nan e santana na Playa.

 

Presidente di Comision Santana di Playa, Sra. Gina Berkley a bisa cu nan ta cla. Dialuna awor nan ta bay pone un container dilanti santana pa asina tur hende cu tin un ser keri dera den nan  santana por bin haci  nan keldernan limpi. E ta haci un peticion nan tur pa percura drecha e keldernan aki y verf nan, y tin posibilidad pa realisa e trabou for di dialuna te cu diahuebs 3 di november cu e santana na Playa lo ta habri for di 8or di mainta te cu 6or atardi.

Dia 2 di november pa 6:30am nan tin e Santo Sacrificio Misa den e kapel di santana mes cu a wordo debidamente drecha.  Tambe riba e mesun dia di tur difunto lo tin un S.S. di misa na Catedral San Francisco di Asis na Playa pa 7or anochi.

 

Comision

E comision aki a wordo lanta na 2009 pa organisa y mantene limpi e santana aki; y e no tabata un trabou facil, ya cu no tabatin niun regla. Despues di 7 aña, Sra. Berkley a bisa cu e hendenan cu tin kelder ta cumpliendo cu nan compromiso cu nan mantencion debidamente. Di nan parti e comision mes ta haciendo uzo di Fantastic Garden pa mantene e santana limpi pa loke ta yerba y mata; y tin otro compania cu ta percura pa e trabou di “grofvuil”. El a bisa cu otro plan cu nan tin ta embeyece e santana ya cu nan tin full un proyecto pa bay drecha e santana, pero te ainda tin hopi kelder den mal condicion cu nan mester evalua kico nan ta bay haci cu nan.

Tin alrededor mil kelder den e dos santana Catolico na Playa. Pa realisa nan trabou di mantene limpi e santana nan ta cobra un suma di 100 florin. E hendenan cu no a bin registra nan kelder y no paga nan mantencion e comision ta cobra nan desde 2010. E hendenan ta cumpliendo cu e compromiso aki sin problema, el a laga sa.

“Si bo ta wak bon e ta menos cu 10 florin pa luna y pa bo mantene e kelder ta costa basta cen”, el a bisa. Antes den pasado parokia tabata carga cu e gastonan di limpiesa tres biaha pa aña  cu tabata casi 40 mil florin pa limpia e dos santana. “E ta imposibel pa nan por haci esey”, el a bisa.

 

Kelder den mal condicion

Ainda tin hopi kelder den mal condicion ya cu e trabou pa drecha y mantene e kelder ta responsabilidad di e famia cu tin’e. Esun cu ta den mal condicion, e comision di santana hunto DVG a wordo afgekeurd pasobra no por haci mas uzo di dje. “Nan chens pa drech’e, esey no ta posibel mas”, el a bisa.

Nan a cuminsa caba basha algun di e keldernan aki abou; y nan a bin construi e prome multi-kelder parti mas panort di e santana. E restonan cu tabata dera den e area ey a wordo dera pa e famia den otro keldernan y otro a cumpra mausoleo cu ta mas chikito. E remarca cu mas tanto e comision di santana di Playa ta bin hayando ta esun di tene e santana habri henter dia. Pero pa nan por haci esey nan mester bin cu un personal di siguridad pa santana ya cu a yega di presenta hopi kiebro ya cu hopi adicto ambulante ta cana rond. Nan no ta respeta e luga aki y te hasta nan ta destrui tur e keldernan pa bay cu e marmer y nan ta bay cu e articulonan traha cu koper.

 

Otro problema cu e comision ta observa ta si bo ta laga e santana habri nan ta topa cu kelder traha sin permiso. Mientras cu tin condicionnan pa construi e keldernan y tambe tin area bunita dilanti di e santana cu nan kier conserva asina. Te hasta ora cu nan tabatin e santana habri y no tabatin ordo, nan tabata dera tambe sin permiso den kelder di otro.

LEAVE A REPLY

Please enter your comment!
Please enter your name here