Organisacion ambiental Rainbow Warriors International ta subraya cu si gobierno ta permiti Repsol pa bora pa gas y petroleo, placa ta bay wordo gana. Pues presidente di e organisacion Milton Ponson ta bisa cu ta haci falta di claridad riba kico ta bay haci cu e fondonan aki cu lo por wordo genera. Esaki tambe como cu e zona economico EEZ ainda no ta regla bon pa Aruba.

“ Mi ta kere cu a bira ora pa tur hende cu ta den parlamento y partidonan politico lanta for di soño y puntra nos ta hefe den nos propio cas? E 50 mil km cuadra cu na unda indudablemente mester tin gas y petroleo, cuanto di esey nos ta bay haya, cuanto Hulanda ta bay haya y Repsol. Y di e parti cu Aruba ta haya, kico ta bay wordo haci cu ne? Nos a publica ayera cu vice presidente di parlamento Rene Herdé a referi pa crea un fondo nacional pa e recursonan cu ta bini di e exploracion aki di gas y/of petroleo si nan ta exitoso.”

E organisacion ta subraya cu nos pais tin un debe externo grandi. Un di e cosnan cu a resalta den tur debate te ainda yegando cerca di eleccion, ta con nos ta bay atende cu debe di gobierno. IMF ta bisa cu mester aumenta impuesto pero niun caminda segun sr. Ponson ta papia di gastonan y entrada. Papiando di e ganashi netto di exploracion di gas cu petroleo: si lo tin gas cu petroleo, kitando tur e gastonan di exploracion, ken ta bay comparti e bolo y cuanto di esaki ta bin pa pais Aruba. Y si tin un parti di e bolo di pais Aruba, gobierno ta bay uz ‘e pa paga debe? Of haci manera hopi otro pais miembro di OPEC (Organization of the Petroleum Exporting Countries) ta haci. Pues cu parti di entrada cu bo ta crea cu exploracion di gas y petrolio ta wordo uza por ehempel pa paga pa salubridad publico, infrastructura of educacion,sr. Ponson ta comenta.

Partner cu Merca y Hulanda
Sr. Ponson ta subraya cu e organisacion desde 2004 ta activo riba e tereno di sistema ecologico maritimo grandi. Nan a bay e conferencia White water to blue water Partnership Conference na Miami cu a wordo organisa pa e estado Mericano conhuntamente cu Hulanda y algun otro pais cu a patrocina. Y na final di e conferencia, sr.Ponson ta conta nos cu nan a establece contacto cu hopi oficial di gobierno Mericano, particularmente e National Oceanic & Atmospheric Administration. E organismo aki cu ta un di e agencianan mas grandi na Merca ta regarda tur cos cu ta toca lama na Merca menos Coast Guard. Pues tur loke ta utilisacion di lama, proteccion di lama, utilisacion di petroleo y derame ta cay bao di e administracion aki.

Sr. Ponson: “Na final di 2004 cu e placa cu a keda di e conferencia na Miami, tabata tin asina tanto sponsor cu a resta 1 miyon dollar, nos a bid y haya 15.000 mil dollar for di United States State Department cu cual nos a organisa un conferencia aki na Aruba. Pa algun organisacion di Venezuela, Colombia, Corsou y islanan den nos area sigui papia riba e tema.” Sr. Ponson ta sigui bisa cu Reino Hulandes pa 2009 segun e tratado UNCLOS (United Nations Convention on the Law of the Sea) mester a cuminsa percura cu tur area maritimo (exclusive economic zones) di Reino Hulandes keda marca y regla huridicamente.

Conferencia gubernamental
Na 2005, gobierno Hulandes, ministerio di Asuntonan Economico conhuntamente cu ministerio di Asuntonan Economico di Antias e tempo ey, a organisa un conferencia na Corsou. Mirando cu Rainbow Warriors International tabata participando caba na nivel internacional riba e tema aki, e comite organisado na Hulanda a acorda pa e organisacion bay participa como observador na un conferencia di gobiernonan. E tabata un reunion pa tur ambtenaar den paisnan concerni. “Ora nos participacion a wordo confirma, e gobierno e tempo ey aki na Aruba di MEP a dicidi di cancela e participacion di seis otro miembro cu mester a bay Corsou. Nos como unico instancia presente a wordo puntra pa sinta den dos grupo di trabao: un di nan pa aspectonan di ley, con pa reglamenta e EEZ di diferente islanan. Y kico ta aspectonan legal cu mester ta regla pa e zonanan keda cla. Tin un otro grupo di trabao cu tabata e utilisacion di recursonan mineral, tur cos cu tin den fondo di lama cu ta inclui pero no exclusivamente gas y petroleo”, segun sr. Ponson.

Despues di e conferencia aki, sr. Ponson ta conta nos cu nan a participa den algun conferencia mas di IMO (International Maritime Organization) y UNEP ariba temanan cu ta regarda lama.

Reglamento di EEZ (Exclusive economic zone)
Sr. Ponson ta sigui bisa cu na 2009 ora cu AVP a gana eleccion, e organisacion hunto cu tres otro mas a traha un documento cu recomendacionnan pa e gobierno di Aruba basa riba programa di gobernacion di AVP. Den cual e ultimo dos pagina ta trata asunto di urgencia pa regla e zona economico EEZ. Sr. Ponson: “Pasobra si nos como pais no regla esaki na ora, Hulanda lo actua como representante pa asina por cumpli den nomber di Aruba exigencianan cu nos tin pa e tratado. Esey en practica kiermen cu Hulanda ta disponi y por deshaci como proxy. Hulanda a probecha for di 2009 te cu 2017 pa regla hopi asunto tras di cortina.”

Manera nos a trece dilanti den nos publicacion di ayera, e modelo Noruega lo ta e base pa crea e fondo nacional aki. E leynan di Noruega ta establece cu e petroleo ta propiedad di nan ciudadanonan y nan no por bira propiedad di niun particular.