Banconan comercial no tin apetito pa proyectonan agrario, segun mr. David Kock

Si Gobierno nobo berdad ta serio den su obhetivo pa bin cu un sector primario cu ta produci, anto mester tin plan concreto, inversion den conocemento y tempo. Esaki ta locual mr. David Kock a bisa Bon Dia Aruba. Kock no solamente ta abogado, sino tin su propio cunucu, Cunucu Aruba Dushi Tera ya pa 12 aña caba.

David Kock a sigui cu interes e formacion di Gobierno y a remarca cu riba su mes, no ta importante cu no tin un Minister di Sector Primario directamente. “Hecho ta cu Raiz ta responsabel den e constelacion actual pa desaroya sector primario. Mi no ta kere cu e titulo ta importante. Ta bay pa e trabou. Si tin un Minister cu ta carga e nomber den su cartera of no, e no ta haci un diferencia, segun mi.”

Di otro banda, ta e Minister di Economia mester trece cambio den leynan y maneho economico pa por stimula sector primario. “A base di e ingrediente cu tin awor aki, ta hopi dificil pa stimula y desaroya e sector aki y pa e ta competitivo. Por tin produccion tumando luga, pero si nan no por competi, no tin sentido. No ta por nada cu desde existencia di e islanan aki nunca tabatin un sector agricola robusto y permanente. Cu excepcion di Aloe, cu realmente ta existi pa mas di 100 aña. Pero pa cuminda, esey no ta e caso.”

12 aña cu Cunucu Aruba Dushi Tera

Kock a inicia cu Cunucu Aruba Dushi Tera na 2009, cu intencion pa mira si e por logra produci su mesun cuminda y ta activo cu tera, cu su mannan. E ta un esfuerso di famia, di su señora, yiunan, suegra y hendenan cu ta yuda. Kock, un abogado cu un bufete hopi prominente a bisa cu “ora mi haya oportunidad mi tambe ta traha den e cunucu, pero no ta asina cu ta ami so ta para henter ora cu e chapi.”

El a cuminza su cunucu cu hopi idealismo. “M’a kere cu mi por a cubri mi gastonan a termino corto. Mi no a pensa mes riba gana placa, y cu esey lo tabata facil pa logra produccion local sostenibel, ademas cu tabatin un mercado pa cumpra e productonan. Pero e tabata un les grandi.”

E reto principal a resulta di ta e produccion y te ainda ta luchando cu esey. Pasobra con cu bay bin, na momento cu no tin produccion grandi, e publico local ta cumpra. Pero asina tin mas cantidad di producto, e ora ta cuminza topa cu muraya, pasobra por ta trapa dede di otronan cu ta den e negoshi. Si tin un poco berdura pa bende den bo propio circulo. Pero si ta un produccion comercial e ta mas dificil. “Y no ta productonan cu por warda. No ta manera bonchi of aros. Si no por bende nan mesora, sea ta come nan bo mes, regala of hasta benta afo.”

David a cuminza planta e productonan popular, manera tomati, promenton, bonchi, pampuna. Pero awendia e ta enfoca riba otro produccion. Motibo ta cu el a confronta e problema di ‘naturalesa,’ “Y aki mi no kiermen e scarsedad di awa, bon tera, sino e pestnan. Esey pa mi a ilustra pakico na Aruba no por tin hopi produccion. White flies y otro pest ta hopi comun. E hecho cu pa decennia no tin produccion tin su motibo.”

Proyecto di amor cu ta costa hopi placa

Cunucu Aruba Dushi Tera ta produci su webonan awor, Pok Pok Pok, pero a pasa den diferente ciclo. A cuminza cu su ‘greenhouse,’ a cria baca, y otro bestia. “E proyecto aki no tabata financieramente responsabel. Pero unabes cu bo ta riba e trein, bo mester sigui, bo ta keda purba. Y den naturalesa, ora kier purba algo no por spera resultado den termino corto. Un prueba por duna di seis luna pa un aña y si e no logra, anto mester cuminza di nobo pa busca kico si por logra. P’esey nos tin asina hopi aña activo.” Den caso di David Kock, su profesion como abogado tabata produci fondonan cu e tabata hinca despues den su cunucu. “Mi no kier bisa esaki pa spanta ningun hende, pero e ta un realidad cu sin mi entrada como abogado, lo no por a wanta e cunucu.”

Cierto momento a cuminza cu galiña y esaki si a logra relativamente bon. “

Falta di conocemento

Sinembargo, e proceso ta dificil for di e prome momento caba. “Nos no tin conocemento na Aruba. Na Hulanda, Colombia, ora cu topa cu un empresa agrario, ta ripara cu e tin varios generacion activo. E welo a cuminza cu a siña e tata y awor e nieto ta continua, cu ta nifica cu e conocemento t’ey den e famia, den e empresa. Na Aruba, sinembargo, e poco conocemento cu tabatin riba agricultura y cria di animal a bay perdi na momento cu e refineria a bin. Mi welo mes tabatin cunucu, cu tabata sostene famia. Pero tur mi famia, omonan, sea a bay traha den refineria of den Gobierno y cunucu a bira tereno pa cas. El a bay perdi.” Pues hopi hende por bin cu hopi idea, pero sin conocemento no por yega mucho leu. “No ta cuestion di pone simia den tera y cobra despues di un luna. Ami tampoco tabatin e conocemento.”

Y den e 12 añanan tras di lomba, el a mira diferente proyecto agrario bin y bay. “Prome paso ta pa traha riba conocemento y a termino corto, lo mester importa expertonan pasobra no ta cuestion di un curso di tres luna. Y di dos, financieramente un proyecto agrario na Aruba ta keda un problema.”

Hasta den exterior unda tin tur e ingredientenan necesario pa lanta un produccion agrario comercial, ta haya cu e empresarionan mester bay un banco specifico. No ta cuestion di bay un banco comercial, pasobra no tin nada pa brinda como garantia, como hypotheek. “Ata tur bo bestianan ta haya un malesa y nan ta muri. Y ta con bo ta pone galiñanan riba subasta, si no por paga e debe. Segun mi den banconan comercial no tin mucho apetito pa actividadnan agricola.”

Pues banda di e hecho cu no tin awa constante (di yobida), e tera no ta asina bon, tampoco tin e espacio necesario. “Ta dunando parcelanan di huur di mil meter cuadra. Pero den agricultura, esey ta djis un hofi. E no ta suficiente pa un actividad comercial. Y no tin suficiente tereno, pa realmente ehecuta proyectonan agrario exitosamente. Mi ta hay’e hopi dificil.”

Ta pa tal motibo, Kock no a mira e campaña pa duna tereno pa plantacion cu a inicia na 2020 como uno cu ta bay produci pa Aruba. Pero e ta compronde tambe e posicion di Gobierno pasobra “si no haci nada, ta haya keho tambe. Pero no por spera cu ta Gobierno ta cuminza planta of cria bestia.”

Rol Santa Rosa

Riba e pregunta cu no ta tarea di Santa Rosa (DLVV) pa brinda conocemento y guia e proceso, Kock tabata hopi directo. Tanten cu no ta inverti den Santa Rosa, no por spera hopi. “Pero, Gobierno no tin e obligacion pa trece conocemento riba agricultura. Pero si esey ta e meta, pero no ta inverti den e hermentnan, lo no por sali mucho di e intencion pa stimula plantacion y cria. Djis menciona cu tin cierto deseo, cierto meta no ta suficiente. Gobierno mester crea e base pa permiti e actividad di agricultura. Conocemento y financiamento.” Problema ta cu Gobierno, mas cu nunca, tin recurso limita, e abogado a remarca.