Alex Matthew, consehero legal di Chania Fernandes Pedra, a expresa preocupacion tocante e manera cu asistencia legal di e acusado a ser maneha durante e ultimo lunanan y ta pidi mas transparencia den e proceso penal.
Durante un conferencia di prensa ayera mainta, Matthew a concentra principalmente riba e dificultad pa Fernandes Pedra haya un abogado cu por prepara su defensa, posible diferencia entre loke ta sucede durante audiencia y loke ta aparece den proces-verbaal, y necesidad pa un investigacion tecnico mas amplio di e accidente fatal.
Fernandes Pedra ta enfrenta un proceso penal relaciona cu e accidente fatal di 4 di januari 2026 riba L.G. Smith Boulevard, den cercania di Renaissance Mall. Dos persona a perde nan bida despues cu un vehiculo a dal nan mientras nan tabata crusando caminda. E caso ta programa pa bolbe dilanti Corte dia 4 di november, despues cu durante e audiencia di 2 di october no por a yega na tratamento den contenido.
Un parti considerable di e conferencia di prensa tabata dedica na representacion legal di Fernandes Pedra. Segun Matthew, e problema ta andando desde juli, ora cu Fernandes Pedra a comparece dilanti Corte sin abogado y a indica cu e kier asistencia legal. Matthew ta sostene cu desde e momento ey mester tabatin suficiente oportunidad pa asigna un abogado y permiti e defensa prepara pa e siguiente fase di e proceso.
E caso despues a ser programa pa 20 di augustus, pero segun Matthew, Fernandes Pedra ainda no tabatin un abogado cu efectivamente tabata preparando su defensa. Durante e audiencia ey a surgi informacion cu dos abogado di Corsou lo tabata disponibel pa atende cu e caso.
Precisamente e punto aki ta un di e aspectonan cu Matthew ta cuestiona. Segun e, despues cu e famia a investiga e asunto, a surgi duda si e abogadonan menciona realmente tabata na altura cu nan lo atende cu e caso y si nan formalmente a acepta representa di Fernandes Pedra.
Un di e puntonan cu Matthew a trece dilanti ta relaciona cu abogado Zahedi di Corsou. Segun Matthew, Zahedi a indica cu no tabatin contacto cu ne pa acepta defensa di Fernandes Pedra y cu e no tabata na altura cu su nomber tabata relaciona cu e caso. Ademas, participacion den un caso na Aruba normalmente lo rekeri coordinacion cu un abogado local. Matthew ta sostene cu tampoco e dos abogadonan menciona a establece contacto cu Fernandes Pedra pa prepara su defensa.
Pa Matthew, esaki ta lanta pregunta tocante con asistencia legal a ser coordina. E asunto a bolbe surgi prome cu e audiencia di 2 di october, ora un otro abogado di Corsou, abogado Dickens, a tuma contacto cu Fernandes Pedra menos cu 24 ora prome cu e audiencia. E abogado a presenta via video durante e audiencia, pero Fernandes Pedra no a acept’e manera su abogado.
Segun Matthew, e problema no tabata simplemente cu Fernandes Pedra no kier un abogado. Su posicion ta cu un acusado den un caso di e magnitud aki mester por conoce su abogado, papia cune tocante e caso y duna e suficiente oportunidad pa studia e dossier completo.
Matthew ta considera cu menos cu un dia no ta suficiente pa un abogado familiarisa su mes cu tur e documentonan, evalua evidencia tecnico y determina si tin investigacion adicional cu defensa kier solicita. P’esey, e famia ta rechasa e impresion cu e retraso den e proceso ta consecuencia simplemente cu Fernandes Pedra a nenga di acepta e abogado.
E audiencia di 2 di october originalmente a ser programa como tratamento den contendio di e caso, pero duranto e audiencia hues a aclaria cu ya esey no tabata e caso. Corte a mantene detencion preventivo di Fernandes Pedra y a fiha 4 di november como e siguiente fecha pa tratamento di e caso. Pa Matthew, e pregunta awor ta si pa e fecha ey lo tin un abogado cu a haya suficiente tempo pa prepara debidamente.
Ademas di e situacion rond di representacion legal, Matthew a expresa preocupacion tocante e manera cu informacion di audiencianan ta ser registra. Segun e, famia a nota cu cierto puntonan cu a ser menciona durante sesionnan di Corte no ta aparece despues den e proces-verbaal.
P’esey, Matthew ta aboga pa introduci grabacion di audio durante sesionnan di Corte. Segun el a indica, un grabacion completo lo crea posibilidad pa verifica despues exactamente loke a ser bisa door di hues, fiscal, defensa y acusado, y lo reduci discusion tocante si un observacion importante a ser inclui corectamente den proces-verbaal.
Matthew ta considera e asunto particularmente importante ora un caso despues bay apelacion of Casacion. Si un argumento of intercambio durante audiencia no aparece den proces-verbaal, segun e, defensa por haya dificultad pa demostra despues exactamente loke a sucede. E ta propone grabacion di audiencia p’esey no solamente como un demanda relaciona cu Fernandes Pedra, sino como un asunto mas amplio di transparencia dentro di proceso hudicial.
Otro punto central den e conferencia tabata investigacion tecnico di e accidente. Segun Matthew, defensa kier un reconstruccion mas completo prome cu tratamento den contenido di e caso, pasobra tin diferente elemento cu, den opinion di famia, ainda mester ser examina of verifica.
Entre otro, Matthew a menciona calculacionnan relaciona cu velocidad di e vehiculo. Segun el a indica, revision di cierto informacion den e dossier a produci un resultado cu no ta realista di un velocidad di aproximadamente 375 kilometer pa ora. E no a presenta e cifra aki manera velocidad cu Fernandes Pedra realmente tabata core, sino como indicacion cu e metodo of calculacionnan den e documentacion tecnico merece un revision mas profundo.
E punto aki ta relevante pasobra interpretacion di evidencia tecnico por hunga un papel importante ora Corte trata e caso den contenido. Te ora cu e evidencia ser presenta y evalua durante e proceso, no por saca un conclusion definitivo for di e cifra menciona door di Matthew.
Segun e representante, un reconstruccion mester combina diferente fuente di informacion pa forma un imagen mas completo di e momento prome cu e impacto. E ta menciona velocidad, visibilidad durante anochi, posicion y movemento di e peatonnan, imagen di video y reaccion di e chauffeur manera elementonan cu mester ser considera hunto.
Matthew ta interesa tambe den informacion electronico cu eventualmente por ser recupera for di e vehiculo. Segun e, sistema interno di un auto moderno por contene dato cu por yuda determina na ki momento e chauffeur a break y cua movemento e vehiculo a haci inmediatamente prome cu impacto. Combinando e informacion aki cu video y otro evidencia, defensa ta busca un reconstruccion mas preciso di e accidente.
Segun Matthew, precisamente pa formula y fundamenta e tipo di peticionnan aki Fernandes Pedra mester tin un abogado cu conoce e dossier. E ta considera cu no ta suficiente pa un abogado simplemente aparece durante audiencia; defensa mester haya oportunidad pa determina cua investigacion adicional ta necesario y presenta e peticionnan corespondiente na Corte.
Durante e conferencia di prensa, Matthew a expresa tambe desconfiansa tocante diferente aspecto di e proceso y a sugeri cu, den su opinion, tin cosnan cu no ta cuadra. El a critica Ministerio Publico fuertemente y a referi tambe na criticanan cu politiconan local a expresa den otro contexto contra actuacion di OM.
Sinembargo, Matthew no a presenta evidencia independiente cu ta establece cu Ministerio Publico, Corte of otro instancia a manipula e caso of cu tin un acuerdo entre autoridadnan pa influencia resultado di e proceso. Su declaracionnan riba e punto aki ta representa su opinion personal.
Alabes, Matthew a enfatisa cu e famia no ta pidi pa Fernandes Pedra evita responsabilidad si Corte hay’e ta culpabel. E posicion presenta durante e conferencia ta cu, prome cu por yega na un sentencia, Fernandes Pedra mester haya oportunidad husto pa defend’e y pa cuestiona evidencia cu defensa ta considera incompleto of problematico.
El a menciona tambe e impacto di detencion prolonga riba Fernandes Pedra. Segun e, e accidente, perdida di dos bida y e periodo den detencion a afecta e acusado emocionalmente. Pa Matthew, esaki ta un motibo adicional pakico acceso continuo na asistencia legal ta importante durante preparacion di e caso.
Cu siguiente audiencia fiha pa 4 di november, representacion legal ta keda un di e puntonan principal. Matthew ta cuestiona si tratamento den contenido riba e fecha ey ta realistico si un abogado nobo ainda mester ricibi y studia e dossier completo, consulta cu Fernandes Pedra y determina si defensa kier solicita reconstruccion of otro investigacion adicional.
Matthew a enfatisa cu su preocupacion principal ta cu Fernandes Pedra haya un oportunidad real pa prepara y presenta su defensa prome cu Corte trata e caso den contenido. Segun e, esaki ta inclui un abogado cu tin suficiente tempo pa studia e dossier, posibilidad pa verifica loke a ser registra durante audiencianan y espacio pa solicita investigacion tecnico adicional si defensa considera esaki necesario.
Cu e caso programa pa bolbe dilanti Corte dia 4 di november, Matthew ta cuestiona si tur e condicionnan aki por ser cumpli na tempo.
