mia no suicido.jpg

E famia directo di Mia Ortiz haya morto den cas diasabra, esta tata, mama y ruman, a manda un carta habri pa prensa unda ta bisa cu nan no ta kere cu Mia a comete suicidio, pero ta trata di un homicidio: “Nos tin confiansa riba e sistema hudicial y policial di Aruba. Por lo tanto, nos ta spera cu conhuntamente cu e medionan legal y forence, lo wordo aporta e pruebanan necesario caminda lo por demostra cu nos Mia stima a bira victima di un homicidio y no di un supuesto suicidio.”

Lesa a carta completo aki bou:

 

Carta habri di famia Bescosme Ortiz

“Mia no a comete suicidio”

E famianan di Mia Bescosme Ortiz, su mama Delia Josefina Ortiz, su tata Jorge Bescosme y su ruman muhe Ella, pa medio di e carta habri aki, nos kier expresa lo siguiente:

1. Nos ta sigur y nos lo busca e pruebanan necesario cu lo demostra cu nos Mia stima no a comete suicidio.

2. Nos tin confiansa riba e sistema hudicial y policial di Aruba. Por lo tanto, nos ta spera cu conhuntamente cu e medionan legal y forence, lo wordo aporta e pruebanan necesario caminda lo por demostra cu nos Mia stima a bira victima di un homicidio y no di un supuesto suicidio.

3. Igualmente nos ta spera cu tanto e autor fisico como e autor intelectual di e crimen barbaro aki lo wordo poni dilanti di husticia.

4. Pa medio di e carta habri aki nos ta haci un solicitud na tur institucion publico y priva, tambe esunnan local y internacional, cu lo desea uni na nos famia pa e echo criminal aki lo wordo aclaria pa pone tras di prizon e autornan. Ya cu e bida di nos Mia stima nos no lo por recupera mas, pero nos lo kier haya consuelo y paz cu merecidamente ta representa e echo di aclaria e inocencia di nos Mia den un acto tan cobarde y vil asina.

Nos Mia stima tabata un mucha muhe feliz, e tabata gusta hari, e tabata masha disciplina ya cu e tabata un deportista di Karate cu e meta cla di sigui cu su studionan. P’esey nos ta consciente y sigur cu e mes no por a comete tal estupidez.

Nos ta conta cu e apoyo di tur hende ya sea tata, mama, hende homber y hende muhe y institucionnan cu lo desea uni den busca di transparencia y husticia di e tragedia teribel aki cu awendia ta afecta nos famia. Nos ta confia riba nos bon Dios.

Delia, Jorge y Ella

          

LEAVE A REPLY

Please enter your comment!
Please enter your name here