MEXICO (EconomiaHoy).- Diamars famia di periodista Salvador Adame, ken a ser haya pa autoridadnan di Mexico totalmente kima, na Michoacan – Mexico, ta exigi un investigacion riba e profesion di e periodista di Adame, como un posibel rason di e crimen. Famia a nenga cu Salvador Adame tabatin relacion cu grupo criminal.
Frida Adame, yiu di e periodista a rechasa den rueda di prensa na Morelia, e prome resultado for di investigacion di banda di fiscalia Mexicano, caminda nan ta sigura cu e comunicador lo a ser asesina, pa problema personal cu un hefe di un grupo criminal. E hipotesis di fiscalia ta basa riba declaracion di Daniel Rubio, miho conoci como ‘El Cabezas, cu ta un supuesto delincuente deteni siman cu a pasa y cu a declara cu e conoce Adame y cu e tin informacion cu Adame a ser asesina pa un hefe criminal, pa motibo cu nan tabatin un “problema personal”.
“Nos no sa nada di e señor Daniel Rubio,” e yiu di Adame a splica.
Adame di 44 aña, tabata propietario di un canal di television local, y e ta di seis periodista cu a ser asesina na Mexico na 2017. Adame a ser secuestra na luna di mei na comunidad di Nueva Italia, centro di Michoacan.“Nos ta solicita na gobierno di Michoacan pa tuma tur linea di investigacion cu tin relacion cu labor periodistico di Salvador Adame,” e periodista Patricia Monreal a bisa. Monreal a lesa un comunicado cu hopi periodista di Michoacan a firma, caminda nan ta solicita na fiscalia general di Mexico, pa laga sa tur avance den nan investigacion di e fayecimento di Adame, y pa asina haya sa si e investigacion di fiscalia ta cuadra cu investigacion di autoridad di estado di Michoacan.
Un periodista di Michoacan a splica cu Adame tabata investiga un stacion di gasolin cu ta funciona cu placa di crimen organisa bao aprobacion di autoridadnan. Oficina di Mexico di e organisacion Reporteros sin Frontera a cuestiona e manera con gobierno kier haya un solucion lihe pa e caso aki.E secuestro di Adame a tuma lugar un dia despues cu presidente di Mexico Enrique Peña Nieto, lo a compromete su mes pa fortalece mecanismo y asina garantisa seguridad di periodista, y combati impunidad manera respuesta pa e asesinato di Javier Valdez. Valdez a ser asesina 15 di mei na Mexico, y su fayecimento a haya condena di hende na Mexico y den exterior. Desde aña 2000 a ser asesina mas di 100 periodista na Mexico, 11 di nan asesina na aña 2016, e cifra record. Mexico ta un di e paisnan cu mas peligro pa ehercicio di periodismo.
