Famia Figaroa a haci entrega di bezwaar riba e proyecto ROP 2019

ORANJESTAD – Ayera, dia 15 di maart, tabata e ultimo dia pa comunidad di Aruba por dirigi na Directie Infrastructuur en Planning pa haci entrega di Zienswijzen pa e proyecto Ruimtelijke Ontwikkelings Plan.

Despues di dia 15 di maart, Gobierno na su turno, a traves di e Raad voor de Ruimtelijke Ontwikkeling (RRO) lo tin 60 dia pa duna e consehonan necesario pa na mei anuncia e ROP nobo, cu lo ta na vigor pa e proximo 10 añanan.

Na DIP, Bon Dia Aruba a entrevista sr. Pedro Figaroa, kende a bay cu algun di e herederonan di Juan Bautista Figaroa, pa haci un entrega di bezwaar riba e proyecto ROP 2019. Figaroa a expresa cu el a haci entrega di bezwaarschrift contra e Ruimtelijke Ontwikkeling Plan pa via cu esaki ta trata di dos parcela cu tin casi 15 hectarnan, ubica na Anabui.

Figaroa a comenta cu e problema ta cu e terenonan aki ta wordo destina como parti di naturalesa, su desaroyo ta masha limita, por ehempel no ta posibel pa eherce e verkavelingsplan, como tal lo ta dificil pa bende e tereno, y pues e herederonan di famia Figaroa ta wordo perhudica den nan interes.

Pa via di esey, Figaroa a bisa cu nan a dirigi na DPI pa haci entrega di bezwaarschrift cu e peticion pa cambia e concepto di tal manera, cu ta permiti pa construi cas of otro. Un parti di e tereno mas grandi tin un frontera cu ta conhunto cu Tierra del Sol, y nan tin e duda dicon e desaroyo ey si ta posibel, y pa e terenonan di famia Figaroa no.

Pa e motibo aki, Figaroa a afirma cu varios inversionista a acerca e famia pa bende e tereno, pero pa motibo cu e posicion di e tereno ta masha limita, esey ta haci su benta mas dificil.

Figaroa a trece dilanti tres punto di e peticion, cu ta bisa cu Anabui ta un ubicacion cu hopi añanan pasa tabata bandona, y awendia ta un luga hopi frecuenta pa e turistanan; e di dos punto el a sigura cu e areanan ey ta tapa manera un tapijt di yerba, cu posiblemente a wordo causa pa via di e quadracer, y pa via di esey e barancanan a disparce; y di tres punto, Figaroa a bisa cu ‘si manera e tereno ta actualmente, esey ta atacha e derecho di propiedad manera e ta hancra constitucionalmente, y ademas e ta nifica un gran daño pa nos’.

Bon Dia Aruba tambe a haya declaracionnan di parti di sr. Kawish Misier, presidente di Camara di Comercio, ora el a haci entrega di Zienswijze KvK Ten AanzienVan Het Concept Ruimtelijk Ontwikkelingsplan 2019. El a splica cu e ROP ta un base unda ta skirbi kico tur mag di haci na Aruba, ki luga por bin cu negoshi, construccion di hotel, entre otro.

Misier a expresa cu e ley ROP ta stipula cu despues di e revision ,tin 30 dia pa pueblo haci entrega di e Zienswijzen, y ayera tabata e ultimo dia, 15 di maart, pa entrega esey. Misier como presidente di KvK a bisa cu nan a haci e uzo di e derecho, y e siman aki nan a haci un reunion unda e pueblo, comerciante, mas di 100 persona tabata t’ey, y nan a duna di conoce cu nan lo kier un extension di e periodo di 30 dia, pa motibo cu nan no ta na altura cu ayera tabata e ultimo dia pa haci entrega di Zienswijzen.

Tambe Misier a haci un denuncia, pa via cu DIP tin un orario di cera pa 4or di atardi, y ayera nan a anuncia cu lo trata te 1.30 di atardi. Manera el a sigura: “Con por ta posibel cu e pueblo mag di entrega Zienswijzen pa e ROP cu ta contra pa e siguiente decada, nos a haya cu awe, ultimo dia, nan ta cera mas trempan”.

Tambe el a splica cu e Zienswijzen cu KvK a entrega ta a base di e feedback cu nan a haya di diferente entrevista cu ‘Gold Members’, y na e mesun momento, nan lo kier wak kico ta reinando den e pueblo, den e comerciante, y eynan nan a pensa cu e comerciantenan ta na haltura y no mester di Zienswijzen; pero door cu nan no ta consciente, el a splica cu nan tabatin un sala cu mas di 100 persona, y tur di nan a haci su preguntanan y con nan ta para cu su derechonan.

Esaki ta un asunto hopi importante, Misier a comenta, ‘nos a trece dilanti na parlamento caba pa e proceso cu mester cana di un manera transparente y pueblo tin cu haci uzo di nan derecho’.

 

 

You May Also Like

Pier y markthallen ta parti di historia y cultura di Rancho

Un desaroyo nobo ta tumando luga cerca e pier di e piscadonan di Rancho ...

Comunidad LGBT di Aruba presente na parada Pride Corsou

Maikel Kelly, representando Alternative Lifestyle Federation Aruba (ALFA) na Corsou, ta conta Bon Dia su ...

12-11-16accarendstraat (3).JPG

Chauffeur bou influencia a dal riba un van pa despues impacta riba container

Diasabra den careda di 5:30 atardi den Caya Boes Orman Ex Arendstraat a sucede ...

12-11-16accidenteponton6.jpg

Autobus a subi caminda dal contra di un auto na Ponton

Dialuna merdia riba e caminda di Ponton a sucede un accidente unda un autobus ...

Cada dos siman mas of menos un idioma ta disparce

Diaranson ultimo tabatin cuater motibo pa celebra Dia Internacional di Lenga Materno. Presidente di ...