Famia Planea Aruba: ‘Malesanan transmiti sexualmente a cuminsa lanta cabes’

Dialuna 26 di September tabata Dia Internacional di Anticonceptivo, cual ta un dia no solamente celebra riba nos isla por medio di Famia Planea Aruba, pero tambe internacionalmente por medio di diferente otro organisacion cu tambe ta traha riba e aspecto di salud sexual y anticonceptivo.

Famia Planea Aruba ta bezig brindando informacion, conscientisacion y guia riba educacion sexual mirando cu mas awor ta mustra cu malesanan transmiti sexualmente a cuminsa aumenta atrobe.

Malesanan transmiti sexualmente a cuminsa lanta cabes segun informacion recien cu Famia Planea Aruba a trece dilanti y ta importante pa proteha bo mes y bo sernan keri. Den cuadro cu dia y siman pa conscientisa riba anticonceptivo, Famia Planea Aruba a bini cu un campaña pa promove mas uzo di condom dentro di nos hobennan sexualmente activo y comunidad en general. Bao di anticonceptivo naturalmente ta cay e condoom, pill y otro metodonan cu tin pero na final di dia e dia aki ta mas pa por concentra – na Aruba pero tambe internacionalmente – riba e importancia di indica tur persona cu nan por tuma control di nan propio salud sexual. “Cu e vision naturalmente pa tin un comunidad mas consciente di nan salud sexual pa asina enfoca no solamente e producto pero tambe riba e mitonan cu tin riba esakinan,” Jonathan Trinidad, coordinado di Famia Planea Aruba. Awendia tin diferente mito y storia cu ta wordo comparti online y ta hopi importante pa brinda informacion corecto cual ta e area di concentracion tambe pa Famia Planea.

A concentra pa provee informacion online riba social media pero tambe personal, e siman aki cu ta e siman di Dia Mundial di Anticonceptivo a concentra hopi riba e partinan aki, tambe lansa un special y duna diferente tayer pa hoben y adulto.

Hopi biaha na oficina di Famia Planea, ora di papia di anticonceptivo, y vooral ora enfoca uzo di condom, semper ta tende cu ‘ai no esey ta laf’ of ‘e ta kibra e vibe e no ta sinti mesun cos’ pues Famia Planea a bin cu un campaña e aña aki den cuadro cu Dia di Anticonceptivo. Lo cuminsa pusha e uzo di condom pa mustra cu eigenlijk uzando un condom no ta ‘laaf’ y Famia Planea tin 24 tipo di diferente condom cu ta varia den color, sabor y textura, pues laaf e no mester ta. A bini cu e prijs simbolico di 1 florin pa ‘Pick n’ Go’ pa kies bo condom faborito y pa 1 florin bo ta haya esaki hunto cu un lubricante pa proteha bo mes y bo pareha tambe.