Harold Kelly, arkeologo na Museo Arqueologico Nacional Aruba, ta splica cu awe Diahuebs 29 di September lo tin un webinar presenta pa Museo Arqueologico Nacional Aruba tocante DNA antiguo. Esaki ta bay ta un introduccion den e proceso aki. Museo Arkeologico den colaboracion cu Universidad Leiden a manda 47 sample di 37 individuo pa un instituto na Alemania pa por saca DNA antiguo aki.

A uza un tecnica basta recien, vooral den e parti di region di Caribe cu ta mas calor y tera ta mas acidido, pues e posibilidad pa obtene e DNA antiguo aki ta bira mas chikito. E webinar lo wordo duna pa un experto den e area aki, Dr. Kathrin Nagele, un investigador post-doctorado na instituto Max Planck pa Antropologia Evolucionario na Leipzig-Alemania. Aruba lo ta e moderador. Dr. Nagele ta concentra su mes riba historia di poblamento di Caribe y Gran Caribe. Aruba lo ta e moderador di e webinar aki hunto cu drs. Harold Kelly. Banda di informacion cu lo wordo duna, e webinar lo wordo uza como sondeo pa haya sa for di e publico kico ta nan interes y preguntanan cu nan lo por tin relaciona cu DNA antiguo.

“Pa nos como museo arkeologico, esaki ta un investigacion hopi importante pasobra lo contribui na par di pregunta fundamental cu nos tin di hopi aña,” segun sr. Kelly.

Esaki sigur ta den cuadro cu preguntanan riba e prome hendenan cu a bin Aruba, y a base di resultadonan cu lo por haya lo por contesta algun pregunta cu lo brinda informacion tocante origen, ki relacion tabata tin cu e region y con nan a biba e tempo ey. E link pa join e webinar ta obtenibel via pagina di Facebook di Museo Arqueologico Nacional Aruba, cual lo tuma lugar awe pa 2’or di merdia te cu 4’or di atardi. Durante su investigacion pa doctorado/PhD na instituto Max Planck pa Ciencia di Historia Humano, Dr. Nagele a bira experto den colecta DNA di regionnan cu poco preservacion di material genetico. E ta uza su conocimento y expertisio pa regionnan tropical, cu enfoke riba Caribe y Oceano Pacifico. For di su estudio pa biologo marino, el a desaroya su punto di bista cu oceanonan ta conectornan y no barera. Entrante Januari 2023, dr. Nagele lo dirigi su propio grupo di trabao cu ta enfoca riba poblamento di Caribe for di perspectiva di arkeologia genetico.