(TMZ) – Paul Walker su famoso Toyota Supra cu el a core den e pelicula “The Fast and The Furious” a bay na un fanatico di e pelicula, ken a cumpra e super auto aki na un subasta pa 550,000 dollar.

E auto di aña 1994 a ser subasta den Las Vegas weekend pasa aki, y e subasta ganado a bini via telefon pa e auto di 10-seconde original di Brian O’ Conner, cual ta e personahe cu Paul Walker a interpreta den e peliculanan di e frankisia “The Fast and The Furious”. E subasta di e supra aki ta un di esunnan mas anticipa den temponan recien.

Fanaticonan di “The Fast and The Furious” conoce e auto aki sumamente bon, e ta e auto cu den e pelicula Paul Walker a drecha prome cu el a gana un Ferrari den un careda na PCH Malibu.

E auto aki tambe a haci un aparicion den e segundo pelicula, “2 Fast 2 Furious” cual a lansa den aña 2003. E doño nobo di e auto lo ricibi e auto, pero tambe tur e documentacion di e origen di e auto y tambe e certificado di autenticidad, pa motibo cu e auto aki ta un auto traha y personalisa na The Shark Shop den El Segundo, California.

Bao di e hood, e supra tin loke ta ser yama y considera “e motor mas conoci cu a yega di sali for di Hapon”, e 2JZ-GTE cual ta ser menciona den e pelicula na e momento cu un di e miembronan di e ekipo di Dominic Toretto ta inspecciona e auto, y ta remarca den un di e frasenan famoso di e pelicula “motor 2JZ, e auto ki lo gana tur”.

Manera conoci, e difunto actor Paul Walker, tin un ruman menor yama Cody Walker. Na momento di papia tocante e subasta, Cody Walker a comenta cu e no tabatin “niun idea pa di ki balor e auto lo por tin” pero si e tabata asumi cu e suma lo ta uno bastante grandi, y e pensamento aki tabata corecto. Tambe Cody a comenta cu Paul Walker mes lo a pensa cu e subasta di e magnitud aki pa un auto ta algo “sumamente pret”.

Cody Walker tabata den basis school ora cu e prome pelicula di e frankisia “The Fast and The Furious” a lansa, y a bisa cu hende y fanaticonan tabata para su persona riba caya tur ora pa conta con su ruman homber grandi tabata e motibo dicon nan a desaroya un amor y aprecio pa autonan lihe y di careda. Tin un comunidad di fanaticonan di e frankisia “The Fast and The Furious”, y cu cada pelicula nobo cu lansa, e comunidad ta sigui crece debi na e gran exito cu e frankisia a logra obtene. Cual ta asina grandi cu te dia di awe, un persona lo inverti casi un miyon dollar solamente pa por tin un di e autonan di e frankisia.