Un siman despues cu conseho di minister a duna su aprobacion pa sigui duna e ayudo di Fondo di Asistencia Social y Emergencia (FASE) y tambe e ayudo financiero pa comerciantenan independiente (ZZP) te fin di december, minister Glenbert Croes hunto cu Sabina De Groot kende ta presidente di e Task Force di FASE a anuncia algun cambionan relaciona cu e ayudo financiero aki.

Ayudo

Durante e conferencia aki, minister Croes a bisa cu nos tabatin un mercado laboral entre Gobierno y sector priva di casi 55 mil hende. Un cantidad di nan ta hayando yudansa. Entre 20.865 ta ricibi subsidio di salario. 2.704 hende di FASE hunto cu e 600 hende di ZZP, e ta alrededor di 24 mil persona cu ta hayando e ayudo aki. Plus 3 mil hende cu ta ricibi bijstad.

“27 mil hende cu ta hayando un yudansa,” el a bisa. E cifra aki no ta inclui esnan cu ta hayando ayudo for di otro instancia humanitario cu ta entrega por ehempel pakete di cuminda, of bono di cuminda y/of cuminda cayente.

Cambionan

Un di e cambio tin di haci cu tur luna esun interesa pa haya e ayudo aki mester aplica di nobo. E ayudo pa comerciante independiente (ZZP) a baha, y e suma a wordo standarisa cu esun di FASE na 950 florin. De Groot a bisa cu nan ta compronde cu e cambio aki por duna un tiki di ‘stir up’ “pero nos mester haciele.” El a bisa cu tur hende mester compronde cu aunke e comerciante independiente a perde entrada, esaki no kiermen cu bo entrada ta na cero. E ta argumenta cu un ZZP tin e posibilidad tin acceso mas lihe na placa enbes di e trahado. Pesey nan a opta pa haci tur hende pareu 950 florin. Menos cu esun di part-time cu ta keda na 450 florin di ayudo di FASE.

De Groot a bisa cu e prolongacion di ayudo aki pa tres luna mas no kiermen cu no tin cambionan. Cada bes nan mester haci e proceso mas stricto a base di nan experiencia di e ultimo 6 lunanan cu e ayudo aki a keda introduci. El a bisa cu na inicio nan a confronta problema debi na e informacion robes y foutnan cometi pa esunnan cu aplica pa e ayudo financiero aki. El a remarca cu mayoria di problema mas tanto ta informacion incompleto. Tur esaki ta complica nan trabao. “Esey no ta gobierno su fout,” el a declara.

El a yega di asigna un team di 15 hende exclusivamente pa yama for di mainta te atardi pa tog logra haya tur informacion manera debe ser. Pero e biaha aki nan no tin e team aki mas pa haci e trabao aki. Pues si e informacion no ta corecto y/of e ta incompleto bo peticion no ta wordo evalua.

Tambe tin hende cu ta aplica dos y mas biaha, y esey no ta recomendabel. E ta conseha pa check bo jukebox e-mail regularmente, eventualmente cualkier contesta of notificacion di FASE por a drenta eynan. E ta urgi tur hende cu ta aplica pa e ayudo aki haci’e un biaha so den e fecha stipula di cada luna, e ta suficiente.

Aplicacion

Den e proceso aki tanto esun cu a yega di ricibi e ayudo aki como esun cu ta haci’e pa prome biaha, nan mester diligencia un aplicacion nobo cada luna entre dia 1 y 15 di e luna respectivo. Tur hende cu a perde trabao y no tin mas entrada por bin na remarca. Bo por manda bo e-mail cu peticion via: asistencia @fasehelpdesk.com. Nan tin dos number di WhatsApp pa manda bo peticion: 699 6992 of 699 1807 (pa ayudo di Fase ZZP). Pa asistencia via: asistencia@fasehelpdesk.com

Ta importante pa yena di forma corecto bo peticion sino lo por confronta dificultad pa tin acceso na e ayudo aki. Ya caba e aplicacion pa luna di october ta habri te 15 di october. Pa luna di november y december e dianan di aplicacion ta bira mas cortico entre dia 1 y dia 10. “Corda ta bo responsabilidad pa yena na tempo,” el a bisa. Esun cu ta yena su aplicacion laat no ta bin na remarca, y no ta posibel mas pasobra e website ta wordo cera.

Evaluacion

El a bisa cu e proceso di evaluacion den FASE ta tuma luga di e siguiente manera: E peticion ta yega cerca e team di FASE pa evalue. Nan ta controla nan y nan ta mande pa Banco di Seguro Social (SVB). Nan ta control’e cu e ayudo di loon subsidie pa evita cu e mesun persona ta aplica pa ambos ayudo financiero. Y despues e pago ta tuma luga. E pago di FASE no ta tuma luga riba e mesun fecha. E pago lo tuma luga fin di cada luna, despues cu subsidio salario ta wordo paga. Esaki ta conta tanto pa prolongacion y aplicacionnan nobo.

Encuanto di aplicacion nobo e ta keda manera a bin tumando luga keto bay. E persona ta haya aprobacion di FASE. Despues e ta bay SVB pa verifica bo informacion. E ta sigui su ruta pa departamento di Asunto Social cu ta conecta cu Censo y despues e ta bay pa departamento di Financia pa finalmente e pago lo por tuma luga. Nan ta purba pa haci un pago cada luna.