Diaranson pasa a tuma luga na Santa Teresita Center di San Nicolas e prome edicion di e cumbre San Nicolas Business Summit, unda varios inversionista local y stranhero a presenta nan proyecto pa propone un desaroyo economico miho pariba di brug.

Un di e proyectonan cu gobierno di Aruba a presenta hopi lunanan atras ta e Fast Ferry, cual ta un opcion pa e ciudadanonan di Corsou y Aruba lo por disfruta, como tambe pa mehora e aspecto turistico y economico, hunto cu San Nicolas Port Authority.

Minister di Transporte, Comunicacion y Sector Primario, Chris Romero tabata presente den e cumbre aki y door di esey el a splica con e proceso di Fast Ferry ta bayendo. Ademas el a expresa cu su persona ta netamente bezig cu San Nicolas Port Authority and Development.

“Esaki ta un di e proyectonan cu a hala atencion di varios inversionista y cu nan ta pensando cu si SN lo bay tin un Port Authority asina, claro cu lo bay tin hopi desaroyo” Romero a sigura.

Pa esaki, e ley ta cla, segun Romero a afirma cu e ta na Directie Wetgeving, pero cierto rekisitonan falta ainda y mester di cooperacion cu e ta hayando caba di Prome Minister, Ministerio di Infrastructura y tambe di Turismo. Idea ta pa mas lihe posibel, prome cu fin di aña mes, trata e ley aki pa asina haya diferente desaroyonan.

Di mesun manera, el a duna di conoce cu Fast Ferry ta den plan di gobierno, pero ta un cooperacion entre gobierno di Aruba y Corsou, cu tin cierto dificultad awo. “Corsou tambe tin e Fast Ferry den plannan, pero esey ta un proyecto cu ta bin di dos banda y Aruba no por dicidi riba esey. Ora nan ta full cla pa sigui, nos ta bay sigui cune”, Romero a finalisa.

 

LEAVE A REPLY

Please enter your comment!
Please enter your name here