Saúl Raghunath ta un studiante Rubiano cu a caba su estudio di derecho, na nivel HBO, na Hulanda. Bon Dia Aruba a acerca e studiante, kende a conta kico e tabata haya dificil durante su estudio y e caminda cu el a cana, lidiando cu discriminacion y tambe obstaculonan, pa termina su tesis na Arubahuis. Pero, na final el a triunfa cu un tesis y proyecto interesante pa Aruba su desaroyo di legislacion di privacidad.

‘Na Aruba no ta duna feedback specifico pa mehora Hulandes’
Reflehando riba e cuminsamento di su estudio di derecho na Hulanda, Raghunath ta corda cu maske e tabatin un bon conocemento di Hulandes, el a haya un sorpresa ora el a cuminsa pasobra su Hulandes no tabata na e nivel cu e mester a ta pa un studiante studiando derecho Hulandes. “Riba caya nan tabata bisa mi cu mi Hulandes ta hopi bon, pero ora mi a cuminsa scol, semper nan tabata wak mi manera esun cu no ta di eynan.” E diferencia ta sinta den e manera cu riba caya hende ta papia con cu ta, mientras na scol y trabou ta mas estricto cu e uzo di idioma.

Esaki claro ta algo cu no ta desconoci. E problema cu idioma y integracion na e pais Europeo pa hende Rubiano ta un problema bon documenta, cual hasta organisacionnan manera Kompas for students ta purba yuda cune. Pero te cu Raghunath no a dicidi di bay tuma bijles pa remedia su Hulandes, e no tabata sa dicon esaki ta asina. “Ora mi a tuma bijles mi a cuminsa realisa cu cosnan basico cu semper na Aruba nan tabata bisa cu ‘bo mester sa caba’ tabata loke mi docente di bijles a yuda mi mas tanto cune. Kier men cu na Aruba nan no ta duna bo un feedback specifico pa bo sa kico bo tin cu drecha.”

Discriminacion di parti di docente
Ademas, el a enfrenta discriminacion na cierto momentonan di su estudio, y di un fuente inespera: Un docente. Den cierto situacionnan, Raghunath ta conta, e por a nota con e docente tabata trat’e diferente cu e resto di e studiantenan, cual tabata mayormente Hulandes naci y crece na Hulanda mes. “Nan a kere mi no ta haal e pasobra mi ta stranhero”. Esaki a bin na su climax den un momento dificil durante su estudio unda e tabata tumando les banda di su estudio di HBO; tambe par di les na universidad na nivel di WO, cual a causa cu e peso a bira hopi pe na cierto momento. “E docente mes no por a kere ora mi a enfrente cu mi sentimentonan cu e lo ta discriminando mi pa via cu mi ta diferente cu e resto di e studiantenan pasobra mi ta stranhero.”

Maske e studiante a enfrenta e retonan aki, el a logra caba su estudio, mientras cu e tabata tuma les tambe na un universidad di nivel WO, despues haciendo un pasantia na Corte Comun di Husticia y finalmente culminando cu su proyecto di graduacion: Un tesis traha pa Arubahuis, na unda Minister Plenipotenciario ta staciona na Hulanda. Su tesis tabata encera analisa con Arubahuis ta anda cu informacion personal di su clientenan, cual ta inclui personanan cu kier cobra pensioen, studiante cu ta haya Arubalening, organisacionnan cu ta pidi subsidio y henter populacion Arubano na Hulanda en general.

‘No ta cu meta politico mi a bay traha tesis na Arubahuis’
Esaki mirando cu for di mei di 2018 e Regulacion General di Proteccion di Dato (RGPD, GDPR den Ingles y AVG den Hulandes) ta implementa na Hulanda, pues e studiante tabata curioso pa sa con leu su implementacion ta bayendo na Arubahuis, mirando cu ta un institucion Arubano cu ta opera na Hulanda (lesa: Europa) y ta anda cu datonan di ciudadano Europeo.

Raghunath a gradua cu su Bachelor of Law (LLB) na Juridische Hogeschool Avans-Fontys na Tilburg, specialisando den hurista di compania (bedrijfsjurist) y tambe den derecho di salud (gezondheidsrecht), derecho di deporte (sportrecht) y derecho di privacidad (privacyrecht).

Cu aprobacion di Arubahuis, e studiante a cuminsa traha riba su tesis motiva pa e curiosidad den un di e areanan den cual el a specialisa. Maske e ta contento di contribui cu su tesis na e avance di e organisacion conoci como Arubahuis, Raghunath ta conta con durante su tempo na e organisacion e tabata haya basta dificil pa traha den un ambiente politico. “Mi no tabata aya pa traha como spion, ni cu meta politico, ta un trabou mi a bay haci. Mi ta kere cu politica mester keda afo di trabou academico.”

Raghunath su famia a entrega su tesis na Prome Minister Evelyn Wever-Croes, pa asina gobierno di Aruba por mira e recomendacionnan cu el a haci den su tesis. E studiante ta preparando pa cuminsa traha riba alcansa su titulo di Meester in de Rechten (LLM).

 

LEAVE A REPLY

Please enter your comment!
Please enter your name here