Por a observa den diferente medionan di comunicacion cu algun grupo di persona a organisa fiestanan clandestino y na mesun momento, probechando e dianan liber tabatin aglomeracion di hende na varios luga.

Cu esaki, comunidad por a compronde cu tin cierto grupo di persona cu ta prefera laga di banda nan salud y di nan mesun famia, ya cu esaki por nifica un acto di iresponsabilidad na unda e mayoria di hende ta tuma nan medidanan di prevencion y di cuido pa nan salud y cu nan por wordo contagia door di un familiar, amigo of conoci cu ta acudi na e tipo di aglomeracion of fiestanan aki.

Tasa di positividad halto y casonan bahando

Segun resumen di ayera dialuna, 69 persona a recupera, a registra un total di 43 caso nobo di Covid-19, di cual 6 ta no-residente. E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 666 test. ‘Postivity rate’ entre nos residentenan ta 43%.

Seccion Epidemiologico di Departamento di Salud Publico cu ta encarga di monitor e cifranan di COVID-19, for di algun dia pasa a informa cu nan a bin observando un patronchi preocupante den resultado di cifranan di COVID-19 pa dia y pa cual motibo ta alerta comunidad riba esaki.

Resultado di e cifranan den e ultimo dianan aki ta indica cu e cantidad di casonan positivo pa dia ta mustra di ta bahando. Sinembargo e data aki pa seccion di Epidemiologie no ta bisa unicamente cu e casonan ta bahando, pa motibo cu hunto cu e reduccion den caso positivo pa dia ta observa tambe cu e cantidad di testnan cu ta wordo haci pa dia tambe ta bahando mientras cu e tasa di positividad si ta aumentando.

DVG a señala cu epidemiologicamente esaki tin un splicacion y esey ta cu e virus ta plamando den comunidad bao di nos radar na cualkier caminda.

Igualmente, nan ta sigura cu tin sospecha cu tin hopi persona canando rond cu e virus y no ta test, of ta tarda pa bay haci nan test di covid. Cu esaki nan ta referi cu e persona ta keda move rond sin haci un test, kisas pa e no wordo limita di su actividadnan of ta pensa cu su sintomanan no ta di COVID.

Esaki ta trece como consecuencia cu e persona aki ta sigui pega otro hende cu e virus. E personanan aki ta plamando e virus tur caminda y por ta pa cualkier persona, por haya e persona aki na nan trabao, den actividadnan social y hasta na misa, e persona por ta un colega, amistad of famia.

Ta p’esey ta importante pa cada persona sigui mantene su mes na e reglanan y consehonan brinda pa riba nan mesun proteccion. Y na momento cu haya e presencia di e prome sintoma parecido na un griep, manera dolor di garganta of nanishi ta core, tuma contacto cu dokter di cas pa por haci un test of yama 280.0101.

Nan ta recomenda comunidad pa no keda cana cu sintoma of pensa cu loke tin no ta COVID, pasobra e por ta COVID y mientras ta sigui cana rond y ta plam’e pa otro personanan.

Pa sigui limita e riesgo di contagio, mantene distancia di actividadnan social unda tin hopi persona, mantene distancia di 1.5 meter di otro individuo y haci uso di tapa boca adecuadamente. Tambe laba man frecuentemente, hopi importante prome cu come y evita mishi den boca, nanishi y wowo.

E medidanan aki no ta garantisa bo proteccion 100%, pero ta yuda minimalisa e risico un poco. Pa e virus di COVID-19 no tin un tratamento, pa e virus aki no tin medicamento y esaki ta e motibo pakico prevencion ta sigui ta asina importante y pa comunidad sigui test mas tanto posibel y mas lihe posibel na prome señal di sintomanan.

Cambio den e distribucion di vacuna

Departamento di Salud Publico a informa cu nan ta trahando pa aumenta e capacidad di vacunacion pa dia y pa logra esaki ta necesario pa realoca nan empleadonan y introduci cambionan organisatorio pa por traha di un manera mas eficiente.

E cambionan ta lo siguiente y ta pidi comunidad pa tuma bon nota di esakinan:

Entrante awe diamars 6 di april, Don Bosco Club na Noord lo no fungi mas como un prikpost, e dos localidadnan cu lo sigui fungi como prikpost ta Centro Libertador Betico Croes na Santa Cruz y Santa Teresita Center na San Nicolas for di dialuna pa diasabra di 8:30 am pa 7:30 pm non-stop.

E siman aki te dia 09 di april ta e ultimo siman cu comunidad por acudi na MFA Santa Cruz, MFA Paradera of MFA Noord pa ayudo cu registracion, entrante dialuna dia 12 di april, lo no tin servicio di registracion disponibel mas na ningun MFA.

Entrante awe 06 di april orario di vacunacion na e prikpost Centro Libertador Betico Croes y tambe Santa Teresita Center lo ta di 8:30 am pa 7:30 pm non stop.

Entrante dialuna dia 12 di april, es cu kier registra pa vacuna ta wordo encurasha pa haci esaki via Aruba Health App, via www.dvg.aw of www.arubacovid19.org. Esunnan cu no por registra via e sistemanan aki menciona, por acudi na prikpost Centro Libertador Betico Croes na Santa Cruz of na Santa Teresita Center na San Nicolas pa ayudo cu registracion entrante 12 di april.

E servicio di ‘Walk In’ sin cita ta sigui vigente unicamente pa ciudadanonan di 60 aña of mas, tur otro ciudadano bao 60 aña mester tin un cita pa wordo vacuna.

Ciudadanonan no tin nan documentonan na ordo y cu ta bibando na Aruba cu ta desea di haya e vacuna por haya ayudo cu registracion tur diahuebs na HIAS Aruba situa na e adres Arendstraat 116 y nan telefon ta 7307770

Ciudadanonan cu ta bibando, laborando, studiando of ta stage pa tempo largo na Aruba y cu no tin AZV por registra ainda den siman aki na un MFA. Entrante e siman di 12 di april e personanan aki mester registra na prikpost Centro Libertador Betico Croes of na Santa Teresita Center di San Nicolas.