Encuesta: Casi 1 di cada 6 persona na Hulanda ta arepenti tuma vacuna contra Covid

(NLTimes)— Casi un di cada seis participante den un encuesta di panel di RTL News a bisa cu nan ta arepenti di a vacuna contra Covid-19. Entre e motibonan menciona ta cu, mirando back, nan no ta mira e necesidad di e vacunanan y cu nan a sinti presiona pa vacuna. Un participante a bisa: “Despues di mi ultimo vacuna contra Covid, mi a keda hopi malo pa un periodo largo.”

Sinembargo, casi tres cuarto parti (72 porciento) di e participante a bisa cu nan tabata satisfecho cu nan decision di vacuna na e momento ey. Dos tercera parti (64 porciento) a indica cu nan lo scoge pa vacuna atrobe si un virus nobo surgi.

Expertonan consulta pa RTL, incluyendo profesor di inmunologia Marjolein van Egmond (Amsterdam UMC) y director di Lareb, Agnes Kant, a enfatisa cu ningun vacuna no ta completamente liber di efecto secundario. Nan a indica cu esaki ta aplica pa tur remedi.

Segun nan, e obhetivo principal di e vacunanan contra Covid-19 tabata pa preveni malesa grave, hospitalisacion y morto. P’esey, infecta cu Covid of sinti malo despues di vacuna no ta nifica cu e vacuna no a funciona.

E expertonan tambe a señala un malentendimento comun: cu vacuna lo preveni tur infeccion. En realidad, su funcion principal tabata reduci e riesgo di consecuencia serio, no pa impedi tur infeccion.

Entre e efecto secundario conoci y documenta ta dolor di cabes, cansancio, keintura, dolor muscular y di coyuntura, molestia gastrointestinal, reaccion na e luga di inyeccion, glandulanan linfatico hincha y, den algun caso, sangramento menstrual abundante.

Efectonan secundario mas raro ta inclui reaccionnan alergico grave (aproximadamente un caso pa cada miyon vacunacion) y miocarditis of pericarditis (menos di un caso pa cada 10.000 vacunacion). Miocarditis ta un inflamacion di spier di curason y tambe por presenta den algun caso di infeccion cu Covid-19.

Pa e vacunanan di AstraZeneca y Janssen tambe a reporta algun efecto secundario raro, incluyendo trombocitopenia inmunologico, mielitis transverso, sindroma di Guillain-Barré y trombosis.

Segun Lareb, algun persona ta reporta sintomanan duradero cu nan ta asocia cu vacuna, y algun miembro di e panel ta kere cu nan kehonan por ta relaciona cu long Covid of malesa despues di vacuna. Sinembargo, aunke e reportahenan aki ta existi, cientificamente ainda no a comproba ningun relacion causal. Investigadornan tambe a indica cu e tema aki ainda no a ser investiga suficientemente y cu tin poco financiamento pa e investigacionnan.

Na mesun momento, estudionan disponible ta indica cu vacuna ta reduci e riesgo di desaroya long Covid despues di un infeccion.

Algun participante tambe a expresa preocupacion tocante condicionnan manera perdida di oido y shingles como posible efecto secundario. Segun Lareb, e posibilidadnan aki ta rekeri mas investigacion.

Algun miembro di e panel tambe a menciona preocupacion tocante loke ta yama “turbo cancer”. Sinembargo, expertonan a bisa cu no tin ningun evidencia cientifico cu vacunanan contra Covid-19 ta causa cancer of morto masal. Nan a enfatisa cu a somete e vacunanan na investigacion extensivo y cu afirmacionnan tocante consecuencia fatal na gran escala no ta sosteni pa evidencia cientifico.