Ayera mainta, den corte di Prome Instancia, a tuma luga e tratamento di e caso contra S. Wilson, ken ta e chauffeur cu a ocasiona e accidente fatal cu a sucede riba dia 2 di october mainta, den cual e rumannan Wouters y e baby di un di nan a perde nan bida. Sentencia di e caso ta tuma luga dia 11 di mei pa 2or di atardi.
Fiscal di Ministerio Publico a splica cu Wilson a testigua cu e anochi anterior el a asisti na un festival y a consumi alcohol. Despues di e festival aki, Wilson a yega su cas 4or di marduga y pa 8or di mainta ya caba e tabata lanta ya cu e mester a traha e siguiente dia pa 10or di mainta.
Segun Fiscal a sigui splica, Wilson tabata na caminda, laat pa trabou na momento cu el a ocasiona e accidente cu a costa bida di tres persona di mesun famia. Na yegada di polis, e acusado a haci e test di supla pa determina su nivel di alcohol, y esaki a sali positivo indicando cu si e tabata manehando bao influencia di alcohol.
Esaki ta e punto principal cu e Fiscal a trece pa dilanti y pa cual el a pidi un castigo di cuater aña. Banda di esaki, mester agrega cu e acusado tabata coriendo sin tin un rijbewijs valido e momento ey.
Otro punto importante cu Fiscal a trece pa dilanti ta cu e acusado tabata coriendo na un velocidad hopi halto. Segun investigacion realisa pa NFI na Hulanda, a determina cu e acusado tabata coriendo na un velocidad di entre 106 y 126 km pa ora na momento cu e accidente a tuma luga.
Un accidente cu a shock Aruba completo y a laga un famia completamente desconsola cu e perdida di tres miembro di nan famia.
Peter Mohammed, abogado di e acusado S. Wilson, a duna declaracion na salida di corte y el a indica cu en berdad esaki tabata un caso na unda tabatin un accidente hopi desafortuna cu a causa tres morto di inmediato, algo cu casi no sa pasa.
Mohammed a indica cu su cliente tin hopi duele di loke a pasa y segun e, husto door di esey e caso aki a bira asina interesante, pasobra e acusado ta indica den su storia cu un auto tabata bin di direccion contrario y door di e motibo ey el a baha for di caminda y a slip bin back riba caminda y dal stret den e auto di e victimanan.
El a menciona tambe e acusacion cu su cliente tabata bao influencia di alcohol, un acusacion cu e no ta di acuerdo cune. El a splica cu ora polis a yega na e sitio, prome cos cu nan a laga su cliente haci ta supla y Wilson a supla net riba e limite di 220 microgram. Pa e motibo ey OM ta sali di punto di bista cu e accidente a wordo causa pasobra cu el a bebe di mas.
Pero Mohammed ta remarca cu den e investigacion a sali na cla cu net prome cu e accidente e acusado a usa listerine y cu polis mes a bis’e cu ta pa e motibo ey el a supla asina halto, pasobra ainda e listerine ta den su boca y e listerine a causa pa e test di supla di alcohol a sali na 287 microgram.
Despues di esaki toch a tuma sanger for di e acusado, e mesun dia algun ora despues. E sanger a wordo manda Hulanda na NFI, y NFI a indica cu e resultado di e test tabata cero, locual Mohammed ta splica cu kiermen cu por tin algun rastro di alcohol, pero no riba e limite di 220 microgram.
“Nos a trece como defensa dilanti cu esey kiermen cu eigenlijk bo no ta castigabel e ora pa alcohol, pasobra fiscal ta usa e argumento di alcohol pa e por exigi un castigo mas halto,” el a bisa.
Mohammed a agrega tambe cu e otro punto di bista di fiscal, cu e acusado tabata core riba velocidad halto, por ta dudoso. El a splica cu den e investigacion a manda e computer di e auto pa Hulanda na NFI, unda nan a haci un rapport y a sali na cla, segun nan, cu e acusado tabata core un speed di entre 106 y 126 km pa ora.
E defensa ta bisa cu esey ta un posibilidad berdad, pero nan a trece dilanti tambe cu NFI a haci e calculacion ey a base di estimacion cu nan a haya di potretnan di e accidente y for di tur e midi cu e departamento forensico di trafico a haci y a base di esey nan haci e calculacionnan.
“E opinion di fiscal ta cu nos por sali di e punto di bista cu NFI ta un instancia renombra y nos por sali di e punto di bista cu indicacion di speed tabata asina halto y p’esey e ta castigabel. Di otro banda nos ta di opinion cu si nos wak e pistanan di e auto, si bo core cu un speed di 110, 120 km pa ora y bo ta sali fo’i caminda, direccion pa e matanan, no tin un manera cu un auto por bin back riba caminda cu e mesun speed y dal un otro auto,” Mohammed a declara.
E punto aki ta keda den man di dicidi pa dicidi kico ta mas creibel y kico ta e ta haya cu tin pa substancia tur e acusacionnan y asina yega na un sentencia.
Mohammed a splica cu Fiscal a exigi tres aña, loke ta nifica cu si en berdad locual fiscal a bisa cu el a corre di un modo asina onoverzichtelijk, desordena, bao influencia di alcohol, esey ta castigonan cu normalmente sa duna.
Pero defensa ta di opinion cu esey no ta e caso y pues den nan opinion e castigo mester ta hopi menos.
Fiscal a papia di core onoverzichtelijk, desordena, versus core roekeloosheid. Pa compronde esaki miho, Mohammed a splica cu tin diferente grado di culpabilidad: tin opzet, cu ta e grado mas halto y cu ta nifica cu a causa e morto intencionalmente. Pero cu accidente di trafico esey casi nunca ta asina, pasobra manera fiscal mes tambe a bisa, niun hende ta subi tras di stuur di un auto cu e pensamento cu nan ta bay core di asina un manera cu nan ta bay mata un hende.
E ora fiscal mester a bay wak e otro elementonan cu a keda y si e por prueba roekeloosheid, imprudencia, cu ta zorg pa un castigo mas halto. Pero fiscal mes ta di opinion cu no ta yega e grado ey y p’esey ta bay na un grado mas abao cu ta onoverzichtelijk, desordena, y cu e chauffeur a core asina desordena cu el a causa e accidente y di tal forma e consecuencia toch ta keda y e por wordo castiga.
Durante e tratamento di e caso, e acusado, S. Wilson, a haya e oportunidad pa bisa algo na e famia di e victimanan y el a expresa na e famia presenta cu e ta hopi sorry pa loke a pasa, a manda palabra di condolencia y forsa pa e famia y a bisa cu e sucedido aki ta algo cu lo keda traha riba dje pa resto di su bida.
