(AP) – Fiscalnan estatal ta investigando e plataforma pa comparti potret, Instagram y su efectonan riba mucha y adultonan hoben, bisando cu su compania mama Facebook – awo yama Meta Platforms – a ignora investigacion interno riba e peligronan fisico y mental cu ta representa pa hobennan.
E investigacion ta lidera pa un coalicion bipartisano di fiscalnan di California, Florida, Kentucky, Massachusetts, Nebraska, New Jersey, Tennessee y Vermont. E ta yega despues di reportahenan acusatorio den corant, prome den Wall Street Journal, basa riba e propio investigacion di e compania, cu a haya cu e compania tabata sa di e daño cu Instagram por causa na adolescentenan – specialmente muchanan muhe – riba salud mental y problemanan cu imagen di curpa.
“Pa demasiado largo, Meta a ignora e daño cu Instagram ta haciendo riba salud mental y bienestar di nos mucha y adolescentenan”, segun fiscal di California, Rob Bonta. “Ta basta. Nos a tuma e investigacion nacional aki pa haya respuesta riba e esfuersonan di Meta pa promove e uso di e plataforma di red social aki cerca Californianonan hoben – y pa determina si, haciendo esaki, Meta a viola ley.”
E investigacion ta enfoca, entre otro, riba e tecnica cu Meta ta usa pa tene hobennan riba su plataformanan – y e dañonan cu pasa periodonan largo riba Instagram por causa.
Den un declaracion, vocero di Meta, Liza Crenshaw a yama e acusacion ‘falso’ y a bisa cu ta demostra ‘un profundo mal entendimento di e hechonan’.
