(AP) – Grupo Sur Koreano BTS a keda corona como artista di aña na e ceremonia di American Music Awards riba diadomingo, ganando contra Taylor Swift, Drake y The Weeknd, hibando cas un total di 3 premio despues cu nan a uni na Coldlay y a duna un presentacion di nan cantica hunto “My Universe” y despues a clausura e programa cu nan hit “Butter.”

“7 mucha homber di Korea, uni pa e amor cu nan ta sinti pa musica, a topa cu e amor y apoyo di tur nos fanaticonan rond di mundo,” miembro di BTS RM a bisa despues cu e grupo a gana e premio di artista di aña pa prome biaha. “Tur esaki ta un milagro pa nos. Nos ta balora esaki hopi.”

E banda tambe a ricibi e premio di duo di genero pop faborito y e premio pa cantica di genero pop faborito cu nan cantica “Butter.”

E programa a celebra e miho musica popular pa un momento cu un mix di canticanan cu tabata popular durante e aña di e pandemia cu un mescla di presentacion live y graba di antemano.

Grupo Silk Sonic su Bruno Mars y Andersoon .Paak a habri e programa cu un presentacion pre-graba di nan cantica nobo di genero R&B “Smokin Out the Window” y Jennifer Lopez tambe a graba su presentacion di e cantica “On My Way” di antemano.

Un presentacion di “Butter” duna pa BTS y Meghan Thee Stallion a keda cancela despues cu e rapper a nombra problemanan personal como e motibo dicon e no por a presenta. Na final el a keda como un di e gran ganadornan, cu e premio di artista di genero hip-hop femenino faborito bayendo na su persona, su album “Good News” ganando e premio di album di genero hip-hop faborito, y su cantica “Body” cu e premio di cantica viral faborito, cual ta un premio nobo e aña aki.

Olivia Rodrigo tabata e artista cu e cantidad mas grandi di nominacion di e anochi, cu 7 nominacion en total, sinembargo su persona a gana solamente e premio di artista nobo faborito di e aña. “Skirbi cantica ta mi faborito den henter e mundo y mi ta hopi gradici cu tur hende cu a acepta mi musica y apoya esaki,” Rodrigo a expresa.

Taylor Swift a gana e premio di album di genero pop faborito cu su album “Evermore.” Den un speech graba di antemano, Swift a bisa na su fanaticonan “Mi tin asina hopi suerte di ta den boso bida.” Swift tambe a gana e premio di artista di genero pop femenino faborito, dunando su carera un total di 34 premio, kibrando e record di artista cu e cantidad mas grandi di premionan gana den historia di American Music Awards.

Rdorgio a duna presentacion di su hit “traitor” live riba escenario cubri cu flor, sigui pa Carrie Underwood y Jason Aldean cu nan dueto graba di antemano, cantando nan cantica “If I Didn’t Love You.” Cu un poco ayudo di Julieta Venegas y Tainy, Bad Bunny a canta nan hit “Lo Siento BB :/.”

Entre e presentacionnan live, banda Italiano Måneskin a haci nan debut na programa na Merca cu nan hit viral “Beggin.” Chlöe di Chloe x Halle a presenta su debut como solista cantando su cantica recien “Have Mercy.” Mickey Guyton a ricibi hopi apoyo di e audiencia durante su presentacion di e cantica patriotico “All American.”

E programa cu ta entrega premionan basa riba voto di e fanaticonan a ser televisa riba ABC desde Los Angeles. E nominadonan tabata basa riba cantidad di benta di album, benta digital, actividad social, reproduccion riba radio y e cantidad di biaha cu el a ser scucha riba plataformanan digital basa riba e periodo di september 25 di aña 2020 te cu september 23 di aña 2021.

Becky G a gana premio di artista Latino femenino faborito, y a duna danki na e comunidad Latino. “Bo no ta bo so,” el a expresa. “Nos ta e soño Americano.”

Machine Gun Kelly a gana e premio di artista di genero rock faborito. “Mi kier acepta e premio aki pa tur e musiconan cu ta cuminsando nan carera, esunnan cu ta desea di toca un instrument, kier rap, kier canta, no solamente e artistanan di e genero aki, pero tur artista en general,” el a declara.

E album Latino faborito a bay na Bad Bunny su album “El Ultimo Tour Del Mundo.”

Anfitrion Cardi B a keda aparece cu un vestuario nobo cada biaha y a anima e audiencia cu hopi festividad. Mas despues durante e show, su cantica “Up” a keda nombra e cantica di genero hio-hop faborito.

LEAVE A REPLY

Please enter your comment!
Please enter your name here