Fitch Report ta accentua Aruba su progreso economico fuerte y compromiso pa reforma fiscal

Aruba ta ricibi reconocimento internacional pa su progreso economico y financiero den un rapport nobo publica pa Fitch Ratings, titula “Caribbean Credit Profiles Improve, but Structural Challenges Remain.” Segun Fitch, Aruba ta sobresali den paisnan den Caribe cu a logra un mehoracion sostenibel den su reputacion financiero y ta haya un “Positive Outlook” pa 2025.

Segun Fitch, Aruba a sobresali danki na:

Un crecemento economico constante unda cu e producto interno bruto den termino real a crece 6.8% den 2024 y ta mantene un nivel saludable di 2.1%-2.9% pa 2025-2026.

Transformacion fiscal cu a resulta den un surplus presupuestario (4.0% di producto interno bruto den 2023 y 2.6% den 2024), superando un historia di deficit presupuestario.

Reduccion significativo di debe di gobierno, for di 100.1% di e producto interno bruto den 2020 pa un debe proyecta na 57.6% pa 2026.

Un strategia bon defini pa desaroya un marco fiscal solido, cu ta inclui e obhetivo pa jega surplus y restriccion riba gasto salarial, y estrecha colaboracion cu Hulanda pa implementacion di un “Rijkswet” pa maneho presupuestario.

Minister di Finanzas, Asunto Economico y Sector Primario, Geoffrey Wever (Futuro) ta reconoce e importancia di e resultado di e rapport como un confirmacion di e strategia cu Aruba a implementa pa stabilidad structural. “E reconocimento di Fitch ta un validacion di nos compromiso cu transparencia, control fiscal, y desaroyo sostenibel. Nos ta riba e caminda corecto, pero nos ta consciente cu tin mas trabao pa haci pa fortalece nos resistencia contra desafionan externo,”el a declara den un comunicado di prensa.

E rapport ta indica cu Aruba ainda ta enfrenta desafionan comun mescos cu otro paisnan den Caribe, manera dependencia riba turismo como e unico sector economico, limitacion demografico y un mercado laboral cu ta rekeri atencion continuo. Sinembargo, e gran progreso structural, incluso e aumento di reserva internacional, ta posiciona Aruba como un lider den region di Caribe pa loke ta trata stabilidad y maneho financiero responsabel.

E grafico di e rapport aki ta mustra cu a pesar cu e porcentahe di e debe nacional den e producto interno bruto di Aruba ta halto, e ta birando esun mas abao den region. Encuanto esaki Fitch ta indica cu acceso na financiamento ta un desafio recurente den region. Pero pa Aruba esaki no ta e caso pasobra e demanda den mercado internacional pa financia Aruba ta hopi fuerte.

Ministerio di Asunto Economico ta reafirma su compromiso pa sigui cu reformanan strategico, diversifica e economia y implementa maneho fiscal sostenibel cu ta prepara Aruba pa un futuro resistente y prospero, segun e comunicado ta finalisa.