Logan Paul a haci su maximo esfuerso, pero na final Floyd Mayweather ta keda un di e miho nan.

No tabatin un ganado oficial den e exhibicion di pelea entre Logan Paul y Floyd Mayweather, pero no tin mester di un hues pa wak con Floyd a domina Paul despues cu e pelea a completa tur 8 ronda.

Logan Paul, di 26 aña di edad ta un celebridad ken su carera a cuminsa subiendo video nan na Youtube, y a logra haya un cantidad di siguidonan asina grandi cu el a expande su carera na rednan social y recientemente den e deporte di boxeo. Su prome pelea tabata contra un otro celebridad di rednan social KSI cual Paul a perde.

E pelea aki contra Mayweather ta su di dos pelea, pero no uno oficial, e tabata un exhibicion cu e proposito di ilustra con un pelea oficial lo bay entre nan dos.

Paul a cuminsa e pelea fuerte cu un serie di movida nan fuerta cu a logra dal Mayweather, Sinembargo, Mayweather di 44 aña, a wanta tur e golpi nan cu Logan por a tira, y a cuminsa tira algun di su mes den e di 3 ronda dilanti un audiencia hopi activo y emociona, y di e ronda aki pa dilanti e pelea tabata un ilustracion di Mayweather su dominacion.

Logan a cuminsa baha velocidad y demostra cansancio cuminsando e di 3 ronda, cual a habri porta pa Mayweather, ken te ainda tabata lihe, fuerte y sigur di su mes. Mayweather tabata mustra suficientemente energetico pa por bay 10 ronda mas mientras cu Paul tabata perdiendo energia y tabata mustra cla pa e pelea caba.

E pelea tabata un exhibicion, haciendo cu no por anuncia un ganador oficial, aunke no tabatin knockout, cual ta custumber pa Floyd, pa tur e persona nan cu a atende e pelea y e audiencia cu a wak e pelea pa medio di un grabacion en bibo cual tabata pasando riba algun website nan, Floyd tabata e ganador indiscutiblemente di e pelea.

Floyd a complementa Paul bisando “E tabata miho di loke mi a pensa” y a comenta cu logan ta un “bon hende” y a admiti cu el a “pasa hopi leuk”. Sinembargo, tambe Mayweather ta agrega cu Paul tin hopi mas di practica prome cu e por cuminsa participa den pelea nan oficial y contra oponentenan mas fuerte cu Floyd.

Paul tambe a duna Floyd complemento bisando “Floyd Mayweather, e tabata un honor. Esaki ta un di e miho momento nan di mi bida y nunca lo mi lubida e dia aki, mi ta contento cu mi por a sobrevivi e pelea aki mirando cu e ta hopi dificil pa dal Floyd”.

Despues di e comentarionan Paul a haci un remarca insinuando cu e lo kier un segundo parti di e pelea bisando “Floyd Mayweather contra Logan Paul 2?”.

Aunke tur hende ta de acuerdo cu Floyd Mayweather, a “gana” e pelea aki, tambe nan ta duna reconocimento na Jake Paul pa e gran trabou cu el a haci mirando cu e tin solamente un pelea den su record cual el a perde.

LEAVE A REPLY

Please enter your comment!
Please enter your name here