Ayera mainta durante un conferencia di prensa Minister di Turismo y Salud, Dangui Oduber, Minister di Transporte, Integridad, Naturalesa y Asuntonan di Adulto Mayor, Ursell Arends, Fundacion Parke Nacional Aruba (FPNA) y Tourism Product Enhancement Fund (TPEF) a anuncia e firma di un acuerdo pa realisa un proyecto pa conserva e saliñanan na Aruba.

Minister Oduber a splica cu algun tempo atras FPNA a pidi un reunion cu Ministerio di Turismo y Ministerio di Naturalesa pa haci un presentacion di un masterplan di tur e deseonan cu nan tin pa di e miho forma por conserva y proteha e naturalesa y tambe crea un balansa di desaroyo economico y di naturalesa.

El a indica cu parti di e masterplan aki ta e proyecto di saliñanan na unda FPNA tabatin e deseo pa haci un estudio conhuntamente cu Wageningen University pa explora e posibilidadnan di introduci un visitor information center como un atraccion nobo pa turista- y localnan

El a sigui splica cu despues di e presentacion aki a sinta cu TPEF pa discuti e diferente proyecto- y peticionnan cu tin, y el a resalta cu e proyecto aki ta uno cu ta fit den e maneho cu gobierno ta hibando.

“Nos ta hibando un maneho cu ta dirigi riba sostenibilidad pa crea un bon balansa den e desaroyo economico y tambe naturalesa y pesey a haci peticion na e board di TPEF pa busca e fondonan necesario pa asina por financia e proyecto aki,” el a remarca.

Minister Oduber a indica cu a firma e acuerdo pa e estudionan aki por cuminsa pa por tin un bista di kico ta tur e accionnan cu gobierno conhuntamente cu FPNA y Ministerio di Naturalesa mester tuma pa por conserva y proteha medio ambiente di e miho forma.

El a remarca cu TPEF ta sostene e proyectonan aki no solamente pasobra e ta conserva y proteha naturalesa, pero na mesun momento e ta bay crea un oportunidad pa explora un tipo di turismo nobo, e ‘eco-turismo’.

Durante e conferencia Minister Ursell Arends a splica cu na 2020 un sistema di cinco saliña importante pa naturalesa a wordo poni bao di e maneho di conservacion activo di FPNA. Esaki tabata consisti di cinco saliña cu anteriormente tabata conecta cu otro y ta wordo señala como ‘moerasgebieden’ y e cinco saliñanan aki tabata conecta cu otro y un di nan a wordo converti den un saliña permanente di awa dushi cu ta forma parti di e tratamento di awa preto di RWZI Bubali.

El a sigui splica cu tabatin un tempo cu e cinco saliñanan aki tabata conecta cu otro, pero e conexion aki a wordo drasticamente impedi y reduci, y hasta separa, door di e desaroyo humano a traves di construccion di caminda y tambe e ‘built enviroment’, un concepto di prepara un area pa actividadnan humano pa satisface e deseonan di e ciudadanonan di e pais.

E mandatario a indica cu pa coregi esaki na aña 2022, Ministerio di Naturalesa, cu apoyo y aprobacion di Conseho di Minister, a instala un directiva tecnico pa asina accion- y plannan concreto por wordo realisa pa conecta e cinco saliñanan aki back. E proyecto aki ta yama ‘Western Wetlands’.

Minister Arends a splica cu e proposito general di e proyecto aki ta pa salvaguardia e saliñanan protegi, pero tambe e ambiente marino den proximidad cual lo wordo haci door di e bishitantenan prudente, maneho y proteccion di e saliñanan y alabes protegiendo, conservando y mehorando e integridad, salud y resiliencia di e bio diversidad y e ecosistema di tur e cinco saliñanan aki.

“E meta ta pa di e forma aki aumenta e balor y producto turistico tambe a traves di experiencianan sostenibel di nos naturalesa y asina contribui tambe na un futuro sostenibel pa Aruba. E proyecto aki ta sirbi un multitud di funcionnan unabes cu e ta conecta cu toro y na final di dia mi ta kere ta e futuro generacionnan la beneficia di tur e cambionan aki.” el a agrega.

E proyecto Western Wetlands lo wordo desaroya den tres fase. E prome fase ta e evaluacion basico pa e proximo pasonan y e evaluacion basico aki ta ser financia pa TPEF.

Tyson Lopez, director FPNA tambe tabata presenta na e conferencia di prensa y el a expresa cu

FPNA como organisacion di conservacion di naturalesa ta contento pa firma e colaboracion entre FPNA, TPEF y Ministerio di Turismo pa asina cuminsa cu e evaluacion basico di kico ta e balor natural.

Lopez a subraya cu e evaluacion aki ta hunga un rol crucial den e determinacion di balor di naturalesa den e area aki y tambe lo produci resultado concreto ariba con pa conserva e areanan aki di awor pa dilanti.

E evaluacion tambe lo yuda cu conseho con pa crea experiencianan sostenibel di naturalesa y transformacional pa bishitantenan, specialmente na Bubali.

Lopez a indica cu na e momentonan aki FPNA ta maneha sistemanan ecologico diverso di areanan protegi cu ta forma mas o menos 20% di Aruba su area terestre y 0.2% di e awanan teritorial. Esaki ta inclui ecosistemanan manera riff, coral, yerba di lama, mangel, saliña, entre otro.

“Saliña ta hunga un rol importante pa Aruba y e tin un funcion esencial den e sistema ecologico incluyendo funcion di actua como filter di awa, provee control contra inundacion y erosion, e ta suministra cuminda y ta sirbi como habitat pa bida y shelter pa pisca y otro bestianan cu ta depende di esaki,” el a subraya.

El a agrega cu saliña tambe ta absorbe nutrientrenan excesivo, sedimento y otro contaminacionnan prome cu nan por yega na lama of otro areanan di awa.

Aruba tin varios saliña y pa e proyecto aki specificamente ta poniendo atencion riba e Western Wetlands, cual ta Saliña Bubali, Saliña Palm Beach, Saliña Cerca, Saliña Malmok y Saliña Druif.

Lopez a menciona tambe cu den total e Western Wetlands ta midi 392 hectar y ta un area importante pa diferente parha cu ta biba na Aruba, pero tambe ta sirbi como lugar pa masha hopi parha cu ta inmigra di Noord pa Zuid di e continentenan.

“Ta mas cu evidente con hopi balor e Western Wetlands tin y p’esey nos mester proteha y mehora e integridad di e balor natural di e area aki y tambe regula actividadnan humano y di acuerdo cu e capacidad di carga cu lo wordo determina como parti di e investigacion di e proyecto aki,” el a enfatisa.