E problema cu a surgi awor cu e propietarionan di stacion di gasolin cu ta bay acepta solamente placa cash no ta un asunto nobo, sino uno cu cada tanto tempo ta keda bolbe pasobra no ta atende esaki di manera eficaz y definitivo. Tin diferente actor den e asunto aki y ta importante pa tuma tur na cuenta, cu nan interes y nan obligacion.

Ban cuminza cu e empresanan cu ta suministra combustible. Gran parti di nan benta ta bin di e productonan di petroleo cu nan ta bende, principalmente gasolin y diesel. Nan no tin caminda di sconde pasobra ta gobierno – ministerio di Asunto Economico – ta stipula prijs maximo di e productonan aki. Den esey no tin espacio pa absorbe gasto extra manera e gastonan bancario cu cada transaccion ta trece pa nan. Esey ta un problema cu mester resolve, pero tin mas.

E banconan comercial a evoluciona den e mundo moderno actual y a cambia di servicio bancario na persona presente, na servicio digital cu ta minimiza e contacto di persona, tanto den suministra cash na banco como na ATM. Mas e poblacion custumbra pa usa debit card, mas banco por economiza riba gasto di operacion pa mantene infrastructura di placa cash. Tambe, mas empresa bay traha cu placa digital, menos gasto tin na banco pa ricibi cash cu empresa ta bin deposita. Es decir, tin un interes empresarial bancario pa stimula mas tanto posible e uso di pago digital. Sin embargo, ta conoci cu hopi empresa chikito no ta haci uso di un POS pasobra e gastonan halto ta demasiado pa e cantidad di transaccion cu nan ta haci. Ehemplo: un negoshi di mecanico di auto posiblemente tin algun cliente so pa dia cu ta bin busca y paga nan auto. Varios biaha e factura ta core den miles di florin, cu e persona mester busca di antemano, sea na ATM y si ta mas ainda, na banco. No bisa cu no ta berdad pasobra nos mes ta pasa varios biaha den e experiencia aki.

Pregunta: pakico na otro pais a yega na e decision, entre gobierno y banconan, cu tur hende mester tin acceso na banco digital, tambe tur empresa? Den esaki anto e banconan tin di asumi nan responsabilidad, pero nan no por haci tanto si e otro interesado grandi no drenta den accion: gobierno. Aki atrobe ta trata di tanto beneficio como obligacion cu ta costa placa. Pa cuminza na inicio di e asunto specifico aki; gobierno ta esun cu por haci algo legalmente pa reconoce cu den e prijs di combustible por bin espacio pa compensa e empresanan di e sector concerni. Basicamente e prijs di combustible ta consisti di gasto di compra, transporte, almacenahe y distribucion na Aruba. Esaki no ta algo transparente pasobra nos ta biba den un pais unda tur cos cu e empresa estatal cu ta importa y distribui haci, ta SECRETO. Banda di esey gobierno ta pone cobranza di accijns riba e productonan aki y ta stipula un margen di ganashi pa e empresanan cu ta bende como detayista. Si tin algo cu por cambia den e prijs aki, bahando accijns, ta gobierno lo mester haci algo.

Fuera di esey ta na gobierno tambe pa inicia e consulta cu sector bancario pa discuti e tema di nos futuro digital, unda ambos banda tin interes grandi. Disponibilidad di servicio bancario na prijs razonable pa tur ciudadano y tur empresa lo beneficia gobernacion enormemente, pasobra esaki lo tin como beneficio maneho menor di placa cash, ademas di mihor control riba economia, tambe riba e sector informal di cual gobierno mes ta bisa cu ta bay haci esfuerzo grandi pa limita esaki. Nos ta completamente di acuerdo cu e meta strategico aki pero ta importante pa gobierno mes realiza cu ta necesario cu cos no por keda na anuncio di accion, sino cu mester tuma e pasonan necesario pa logra esaki, y facilitacion general di transaccion digital ta un interes cu gobierno mester reconoce, y actua ariba.

Pa e banconan den e contexto aki tambe tin interes y obligacion. Mescos cu gobernacion, nan tambe ta probecha di un grado halto di digitalizacion di e trafico monetario, manera ilustra anteriormente caba. Sin embargo, gasto halto bancario pa e usuario chikito ta keda un obstaculo, si no busca solucion. E gastonan halto bancario ta haci cu te awe nos tin ciudadano cu na comienzo di luna ta kita practicamente tur nan entrada di luna for di nan cuenta y ta maneha tur transaccion cu placa cash, di e manera aki evitando e gastonan di transaccion di banco. Mester ta posible pa haya un ‘middle ground’ aki, unda banco tambe ta probecha cu mas placa ta keda riba cuenta, y di otro banda mas placa ta drenta di comercio por via digital y ta drenta anto mas tempran riba cuenta. Aki banconan ta sali gana cu gradualmente sumanan mas grandi riba cuenta di banco, pues mas placa pa por traha cune, y gana interes.

Finalmente, e otro parti interesa cu no tin pakico di paga e cuenta aki, en todo caso, no di e forma aki: e consumidor. Ta necesario analiza y resolve e problema cu a surgi cu benta di gasolin di un forma hopi mas amplio pa pone fin tambe na e problema general cu nos no ta avanza den limita uso di placa cash, si ta simplemente hinca e consumidor cu e problema. Por supone cu gobierno y sector bancario di berdad kier bay den direccion di menos transaccion cash, o ta nos ta kere den ilusion…?