Luna di october a keda decreta como luna di adulto mayor. Sigur un luna unda nos di Fraccion MEP ta pone extra atencion na nos grandi nan y asina diabierna ultimo 22 di october 2021 algun di miembronan di Fraccion MEP a pasa bishita Sr. Jossy Ridderstaat. 

Jossy tabata di bishita na Parlamento di Aruba diabierna 15 di october hunto cu fundacion FAVI unda el a yuda parlamentario drs. Shailiny Tromp-Lee crusa caminda den e ‘blindfolded challenge’. Akinan Jossy a comparti cu nos cu e lo cumpli 85 aña di edad riba 22 di october. El a comparti cu Fraccion di MEP e dia aki con tiki actividad tin pa personanan di edad, mas aun pa esunnan cu ta pasa gran parti di nan dia nan so na cas.

For di momento cu Jossy a comparti esaki cu parlamentario drs. Shailiny Tromp-Lee di biaha Fraccion di MEP a reserva e bunita fecha aki den agenda pa asina pasa un rato cerca Jossy, canta happy birthday, corta bolo y combersa un rato. Jossy a emociona y sigur a keda masha contento cu e bishita y a gradici hopi cu a corda cu el a haci aña. Nos ta desea di curason pa nos Bon Dios sigui drama bendicion riba Jossy, brind’e hopi salud y pa e keda semper e homber balente y chaskero cu e ta!

Di e forma aki tambe nos di Fraccion MEP ta desea di demostra cu un simpel momento hunto ta nifica hopi pa nos adultonan mayor. Pesey nos kier encurasha abo tambe pa comparti maske ta 1 ora extra cu mama, papa, welo, wela, tanta, omo of un bisiña cu bo por mira cu ta pasa hopi rato su so.

LEAVE A REPLY

Please enter your comment!
Please enter your name here