Durante un conferencia di prensa e siman aki, lider di fraccion di MEP, Evelyn Wever-Croes, a critica e manera con e proceso cu a culmina den e contrato entre Aruba Tourism Authority (ATA) y EcoTech pa operacion di e Zona di Desperdicio permanente na Barcadera a ser maneha. Segun Wever-Croes, e partido no ta cuestionando e importancia di e proyecto ni e necesidad di crea un facilidad permanente pa maneho di desperdicio, sino e forma cu e decisionnan a ser tuma y e proceduranan cu, segun e fraccion, no a ser sigui. Mas cu solamente critica e proceso, Wever-Croes a splica tambe con, den su opinion, e proceso mester a cana.

E declaracionnan a sigui despues di un reunion publico den Parlamento unda minister di Turismo, Transporte y Labor, Wendrick Cicilia, a duna splicacion tocante e participacion di ATA den e proyecto. Durante su conferencia di prensa, Wever-Croes a bisa cu fraccion di MEP a haci un analisis di e informacion presenta pa minister. El a indica cu regularmente oposicion ta ser critica pa solamente critica, pero cu den e caso aki nan a kier presenta sugerencianan concreto di con e gobierno por a maneha e proceso di un manera cu ta mas conforme cu bon gobernacion y e proceduranan cu, segun nan, mester a ser sigui.

E Zona di Desperdicio a habri oficialmente su portanan dia 1 di juni 2026 na Barcadera como un facilidad permanente unda residentenan por entrega bulky waste, desperdicio di cas y desperdicio di hardin. E iniciativa a reemplasa e sistema temporal di “Baki den Bario”, cu durante varios aña tabata ofrece oportunidad pa comunidad deshaci di desperdicio na diferente bario. Segun gobierno, e proyecto ta forma parti di e campaña Aruba Limpi y ta busca reduci tiramento ilegal di sushi, facilita un manera mas practico pa deshaci di desperdicio y mehora limpiesa di e isla. E facilidad ta ser opera riba tereno di EcoTech y durante su fase inicial a ser financia cu fondo canalisa via ATA.

Gobierno a presenta e iniciativa como un inversion den sostenibilidad y calidad di bida, argumentando cu un Aruba limpi ta beneficia tanto residente como sector turistico. ATA, di su parti, a splica cu e financiamento ta cuadra den su vision di reinverti entrada genera pa turismo den proyectonan cu ta beneficia comunidad. Segun cifranan publica despues di e apertura, den e prome simannan di operacion casi mil vehiculo a haci uso di e facilidad y mas di 165 ton di desperdicio a ser entrega.

Segun Wever-Croes, fraccion di MEP ta completamente di acuerdo cu e obhetivo di mantene Aruba limpi y cu crea infrastructura permanente pa maneho di desperdicio. Sinembargo, el a enfatisa cu un bon proyecto no ta elimina e obligacion pa sigui e proceduranan legal y administrativo. Segun e lider di fraccion, precisamente pa motibo cu e proyecto ta importante, e proceso mester a ser maneha di un forma impecabel.

E prome recomendacion cu Wever-Croes a presenta ta cu e iniciativa no mester a ser lidera for di ministerio di Turismo. Den su opinion, minister Wendrick Cicilia tin suficiente responsabilidad den e area di turismo y labor, mientras cu maneho di desperdicio ta un competencia cu ley ta pone bao di minister Arthur Dowers. Pa motibo ey, Wever-Croes ta haya cu minister Dowers mester tabata e minister encarga pa conduci e proyecto y pa negocia cu e companianan envolvi.

E di dos recomendacion di fraccion di MEP ta relaciona cu e rol di ATA. Segun parlamentario Wever-Croes, ATA no tin e conocemento tecnico necesario pa evalua diferente opcionnan den sector di maneho di desperdicio. El a argumenta cu, si ATA kier a contribui financieramente na un proyecto cu ta beneficia comunidad y tambe turismo, e organisacion por a haci esey door di paga un dividendo mas halto na gobierno. Despues di esey, gobierno lo por asigna e fondo na e minister competente, cual lo por sigui e proceduranan normal pa selecciona un operador. Segun Wever-Croes, e forma di traha aki lo mantene un separacion cla entre e mision di ATA como promotor di turismo y e responsabilidad di gobierno den maneho di servicionan publico.

Otro aspecto cu parlamentario Wever-Croes a enfatisa ta cu e contratacion mes. Segun su interpretacion di e legislacion cu ta regula ATA, un proyecto di e magnitud aki mester a pasa door di un destaho publico. El a argumenta cu incluso pa situacionnan urgente ley ta contempla proceduranan specifico, y pa motibo ey ta di opinion cu e contrato no mester a ser otorga directamente. Segun fraccion di MEP, sigui un proceso di destaho no solamente ta fortalece transparencia, sino tambe ta ofrece oportunidad pa evalua si tabatin otro proveedor cu por a ofrece un miho propuesta.

Den e mesun contexto, e lider di fraccion di MEP a dedica atencion na loke el a considera un asunto di bon gobernacion. Segun informacion comparti anteriormente door di minister Cicilia, e presidente di Hunta di Directiva di ATA no a participa den e negociacionnan pasobra e ta ocupa tambe un posicion importante den e grupo empresarial cu a haya e proyecto. Segun MEP, si ya a ser determina cu tabatin un potencial conflicto di interes durante negociacion, e mesun principio mester a ser manteni te na e ultimo paso di e proceso. Pa motibo ey, Wever-Croes ta di opinion cu e purchase order no mester a ser firma pa e presidente, sino pa un suplente, pa elimina cualkier duda tocante imparcialidad.

Segun e lider di fraccion, e cuatro puntonan aki ta forma e recomendacionnan principal cu fraccion di MEP kier a comparti cu gobierno cu e meta pa simplemente contribui cu sugerencianan concreto pa evita situacionnan similar ripiti.

Parlamentario Wever-Croes a agrega cu, si durante e proceso a erornan a ser cometi, gobierno ainda tin oportunidad pa reconoce esey, pone tur documentacion disponible y evalua si tin aspecto cu por corigi. Segun e, un actitud transparente lo contribui na confiansa di comunidad cu ta sigui defende un procedemento cu ainda ta genera preguntanan.

Wever-Croes a indica cu e fraccion ta wardando documentacion adicional cu a ser solicita na minister Cicilia pa por haci un evaluacion completo di e caso. Basa riba e informacion cu minister a presenta durante e reunion publico den Parlamento, MEP a yega na un conclusion provisional cu e procedemento no a sigui e caminda cu nan ta considera corecto, pero e partido ta enfatisa cu e analisis definitivo solamente lo sigui despues cu tur documentacion solicita ta disponible.

E asunto di transparencia ta keda un elemento central den e debate. Durante e ultimo luna, MEP a presenta decenas di pregunta parlamentario tocante financiamento, seleccion di EcoTech, e rol di ATA, supervision di e proyecto y e relacion cu e servicionan cu ya tabata existi den sector di maneho di desperdicio. Segun e fraccion, Parlamento mester haya acceso completo na e informacion pa por determina si e procedemento a cana conforme ley y conforme principionan di bon gobernacion.

Mientras tanto, gobierno ta sigui defende e iniciativa manera un proyecto cu ta responde na un necesidad cu tabata existi pa hopi aña. Segun e splicacionnan oficial, e Zona di Desperdicio ta reemplasa e sistema temporal di Baki den Bario cu un facilidad permanente unda ciudadano por deposita desperdicio durante tur siman. Gobierno tambe a indica cu despues di seis luna di operacion lo haci un evaluacion pa determina e impacto di e facilidad y considera posibilidad di expande e concepto.

Na momento aki, e debate no ta concentra riba e utilidad di e Zona di Desperdicio, sino riba e manera cu e contrato entre ATA y EcoTech a ser negocia y formalisa. Mientras gobierno ta pone enfasis riba e resultado practico di e proyecto, fraccion di MEP ta sigui sostene cu e mesun resultado por a ser alcansa siguiendo un proceso cu, segun su criterio, tabata mas transparente, cu mas separacion di responsabilidad y cu respet pa e proceduranan legal y administrativo existente.