Siman pasa durante reunion publico den Parlamento, Fraccion di POR a presenta un mocion pa sondia ubicacion di un tereno pa traha un pista di Bike Cross na nos isla. Miembronan di Fraccion di POR ta considera cu ta hopi importante pa fomenta desaroyo deportivo profesional den tur sentido y den tur deporte cu Aruba por resalta no solamente local, pero tambe internacionalmente.
Pa tal motibo nan a presenta e mocion cu a haya sosten di e otro dos fraccionnan cu ta sostene Gobierno, esta MEP y RED.
E mocion ta bisa cu considerando cu tin mas di 100 atleta ta practica e deporte di BMX; cu na Aruba no tin un pista adecua pa e atletanan en general practica nan deporte; cu BMX ta un deporte Olimpico; cu atletanan di BMX a yega di trece bek Aruba titulonan di campeon di mundo, finalistanan di mundo, finalista di Panamericano, Centro Americano y mas; cu tin Atletanan preparando pa Olimpiada 2020; cu tin Atletanan hoben den formacion y preparacion pa cuminsa core den nivel profesional y; cu pa motibo cu no tin pista internacional ta dificil pa tene caredanan internacional y profesional na Aruba.
Teniendo na cuenta e consideracionnan aki e mocion ta urgi gobierno pa sondea ubicacion di un tereno mas lihe cu ta posibel y traha un pista di Bike Cross (Super Cross) riba nivel internacional pa asina nos atletanan en general por practica nan deporte y por tin un miho preparacion ora di competi riba un nivel internacional y asina por trece miho resultado bek pa nos pais Aruba.
Fraccion di POR lo keda monitorea e desaroyo di e mocion cu a keda aproba den sala di Parlamento y ta spera cu en berdad e por haya e atencion debido y mas pronto cu ta posibel pa asina nos atletanan di Bike Cross port a miho prepara pa e siguiente eventonan deportivo internacional.
