Aña escolar a caba di habri y dos linguista a recorda cu 15 di augustus, pero 50 aña pasa, nan a cuminsa traha como docente na Colegio Arubano; nan ta Joyce Pereira y Ramon Todd Dandaré.

E trayectoria profesional di nan dos ta hopi liga cu e desaroyo di nos idioma Papiamento den enseñansa, y muy specialmente cu introduccion di Papiamento como lenga di instruccion den nos sistema di enseñansa. Pero esaki no ta puro casualidad. Bon Dia Aruba ta publica e prome articulo di un serie di dos, inicialmente dedica na e Doctor di Papiamento den Enseñansa, Joyce Pereira, tocante e hubileo aki.

Inicio
Como un hobencita di 17 pa 18 aña, el a cuminsa su estudio como docente di scol basico na Aruba. For di e tempo aya, na momento cu e tabata core stage na e scolnan, e por a mira e problema cu dunando les na Hulandes no tabata beneficioso pa nos muchanan. E ta cualifica esaki como un ‘experiencia horibel’, pasobra e tabata prepara su lesnan cu masha energia y idealismo, ‘pero ora cu bo drenta klas y bo mester duna les, e muchanan tabata manera perdi’. E ta corda cu e muchanan cu wowo grandi habri ta mira bo, ya cu e muchanan no ta comprende bo. Anto cu man y cu pia, e mester a splica un ke otro. El a trece e anecdota aki cu un sonrisa, loke antes tabata un frustracion como docente p’e.

Tabata tempo cu Papiamento tabata strictamente prohibi, y como docente bo no por a uza nada di Papiamento, sino cu bo mester a duna henter bo les na Hulandes. Ya caba e preocupacion tabata latente cerca Pereira y un grupo chikito di su compañeronan di docencia na Aruba, caminda den un forma critico nan tabata puntra e docente di pedagogia y didactica: “Dicon e sistema ta asina?”
“Mi no por splica boso… Haci loke e buki ta bisa… Anto siña di bo mentor di klas…” E tipo di contestanan aki no tabata uno satisfactorio pa e grupo di hoben masha inkieto y dicidido aki.

Pereira ta corda cu el a cuminsa traha na Aruba, ora cu el a caba su di dos estudio. Su prome estudio tabata pa maestro di scol basico, y ora cu el a caba cu esey, tempo e tabata un hobencita di 20 aña, el a bay studia na Hulanda, unda el a cuminsa traha como maestra den scol basico y pareu el a cuminsa cu su estudio di Hulandes MO-A (comparabel cu Bachelor Hulandes awendia).

Unabes cu el a finalisa su estudio como maestra di scol basico, e por a deduci cu tabata existi un problema cu e lenga Hulandes, y el a dicidi di studia e idioma aki pa bira docente di dje. Pero tabata Hulandes como idioma materno, ya cu Hulandes como lenga stranhero tabata un concepto desconoci e tempo ey, y Hulandes como di dos idioma mucho mas desconoci ainda.

Na aña 1969, net 50 aña pasa, unabes cu el a bin cla cu su di dos estudio, Pereira tabatin 23 aña, ora cu el a solicita trabou na Colegio Arubano, unda el a cera conoci cu Ramon Todd Dandaré, kende tambe a haci su estreno como docente den e instituto aki. Den un comunidad masha parokial e tempo aya, ainda e ideanan di cambio den enseñansa tabata den bruki, y esun di bin cu cambio tocante idioma di instruccion tabata impensabel.

Pereira a haya tur klas, for di e prome klas te cu klas di examen, pa duna les na Colegio como docente di Hulandes. Como docente jong tabatin klas cu semper tabata hala su atencion. Den e prome periodo cu el a cuminsa duna les na Colegio, e por corda algun di su studiantenan, entre otro Amy Lasten, Mirto Laclé, Stanley Heinze, Frans Laclé, Lydia Emerencia y Stan Kuiperi.

Otro alumno cu Pereira tabatin den e prome periodo cu el a traha na Colegio ta Dr. Ike Posner, e ta corda cu un sonrisa riba su cara. Un dia Pereira tabatin un cita medico cu e ex-alumno aki, y ora cu el a compronde cu e saminacion tabata uno riguroso y completo, el a pidi e assistent pa kita su nomber y el a bandona e consultorio na careda.

50 aña despues, cu nostalgia Pereira ta reconoce cu tabata duro p’e, ora cu, despues di dos aña di duna les na Colegio, e mester a despedi di su studiantenan pa bay Hulanda pa sigui cu su estudio.

Papiamento y enseñansa
Durante su prome periodo di dos aña trahando na Colegio e por a experencia mas profundamente e problema di e muchanan cu no por a compronde hopi cos na Hulandes. Nan tabata studiante elite y supuestamente esunnan mas sabi di Aruba, pero nan no tabata compronde nan textonan manera debe ser, y sin comprension di texto bo no por siña.

Na 1971 pa di dos biaha Pereira a dicidi di bay Hulanda pa sigui su estudio di MO-B Hulandes y alabes el a sigui e parti di doctoraal tambe. Mirando cu e tabatin un oferta laboral caba pa bay traha na APA (awor IPA) unabes cu e bin Aruba bek, el a dicidi di prepara su mes mas riba Papiamento, y na Universidad di Amsterdam el a scoge Papiamento como bijvak (awor minor) cerca meneer Raul Römer, y banda di esey el a haci linguistica aplica entre aña 1971 y 1976. E tin grato recuerdo di e academico Antiano aki, ya cu cerca dje el a siña investiga nos lenga Papiamento, y profundisa mas den dje haciendo diferente investigacion.

E temporada ey Pereira a cualifica como uno ‘hopi bon’, ya cu a sali diferente estudio, un di nan e buki ‘Cabes Duro?’ di A.C. (Nelly) Prins-Winkel na 1973. E tabata un buki revolucionario e tempo aya, den cual Prins-Winkel a investiga con nos muchanan ta siña, y e sistema cu nan ta siña den un idioma stranhero, cu no ta nan idioma, y cu ta stroba nan den nan desaroyo normal di siñamento.

Pero tabatin un otro buki cu a pone nos hendenan reflexiona tocante con un pueblo colonisa ta siña rechasa y menosprecia su mes, entre otro su propio idioma y cultura. E ta referi na e buki ‘From objective to subjective social barriers’ di A.F. Paula, publica na 1968.

Na aña 1976, unabes cu Pereira a bin Aruba bek, e panorama tabata otro. Manera tabata planea, el a cuminsa traha na APA y tambe na Antilliaanse Lerarenopleiding. Pero e ta haya cu su experiencia na APA tabata sumamente interesante y inolvidabel, pasobra el a haya un chens pa cuminsa duna les di Papiamento. Eynan e por a desaroya e curiculo di Papiamento a base di e bukinan den ortografia etimologico di Papiamento di Aruba. Pa 1980 Antilliaanse Lerarenopleiding no a continua y Pereira a dicidi bay traha na Colegio bek te aña 1993, ora cu APA a bira IPA y e docente aki a bay traha full-time na e instituto aki. Durante su di dos etapa na Colegio, el a duna les na varios generacion di studiante, entre nan nos Prome Minister Evelyn Wever-Croes y Minister di Husticia, Andin Bikker.

Sindicalismo y cambio den enseñansa
Igualmente, pa e epoca ey tabatin un grupo di docente cu tabata masha critico riba nos sistema di enseñansa, y nan tabata hinca den sindicalismo. Tabata un ambiente mundial, caminda e pueblonan colonisa a cuminsa lanta for di soño, y Aruba no tabata un excepcion. Ta asina cu e sistema di enseñansa a cuminsa cambia na Aruba, pero na scol, unda nan tabata traha na Colegio Arubano, no tabatin mucho cambio, mas bien resistencia contra cambio.

Haciendo un retrospectiva di su trabou como docente, Pereira ta recorda cu tur e añanan ey na Colegio, na APA, na IPA, y trahando cu su coleganan, entre otro Todd Dandaré y Pedro Velasquez, kendenan e ta considera como su miho amigonan, nan a yud’e tambe den su formacion. E ta haya cu na IPA, Papiamento a haya un luga importante como materia.

Den practica, na IPA nan no tabata mira e materia Papiamento como un inicio pa introduci Papiamento como lenga di instruccion den enseñansa, sino su meta tabata pa por a yuda e muchanan y e mayornan. Pero, IPA a bira e plataforma ideal pa transforma den un Academia di Papiamento exitoso. Awendia Universidad di Corsou tin un Master di Idioma cu ta inclui Papiamento, y nan a crea un aliansa cu IPA. Na Aruba nan por tin e filial di e Alma Mater aki haciendo uzo di tecnologia moderno. Asina, tin diferente docente na Aruba cu a haya nan Master, te awor shete, y algun mas cu ta cabando e estudio di Master di Papiamento.

A base di su experiencia di hopi aña na APA y IPA, Pereira ta haya cu e generacion nobo di docente no mester keda keto y nan mester bin cu nan ideanan dilanti. Ya cu nan ta trahando den un situacion cu ta ‘horibel’, y nan ta hopi frustra, ya cu nan mester haci hopi cos pa duna les den un idioma cu no ta nan idioma, ni tampoco ta e idioma di e muchanan.

“Nan mester bin dilanti y laga pueblo sa cu e cos aki no por sigui mas”, el a declara.

Recordando tempo pasado y bolbiendo bek den presente, Joyce Pereira, e Docente, e Linguista, e Papiamentista, ta sinti cu te ainda ‘mi mester por aporta na e enseñansa aki y na e cambio aki’.