Na final di e reunion publico cu a tuma luga diamars 16 di april den Parlamento di Aruba, na unda minister di Labor, Energia y Integracion, Glenbert Croes a rindi cuenta y a contesta diferente pregunta ariba loke ta su maneho den e tema di migracion, fraccionnan MAS y AVP a entrega mocion di desconfiansa contra e minister aki.

Tabatin un total di dos mocion cu a ser entrega na final di e reunion publico. Mocion number uno tabata e mocion di desconfiansa contra minister Croes, entrega pa lider di fraccion MAS, parlamentario Marisol Lopez-Tromp y respalda pa fraccion AVP. di partido MAS y AVP.

Mocion number dos tabata un mocion di fraccionnan ACCION21 y RAIZ den cual nan ta urgi Gobierno di Aruba pa regularisa temporalmente personanan indocumenta cu ta cumpli cu rekisitonan pa salvaguardia y promove interes general. E mocion ta indica cu den caso cu minister Croes no por cumpli cu e deseo, ta pidi pa bolbe parlamento den 90 dia cu un splicacion pakico no por haci esaki.

 

Pa loke ta mocion number un di fraccion MAS y AVP, e mocion di desconfiansa contra minister di Labor, Energia y Integracion, Glenbert Croes, e base di e mocion aki ta e falta di maneho di parti di e minister en cuestion pa cu e cartera aki.

Parlamentario Lopez-Tromp a remarca cu nan ta entrega e mocion pasobra nan no tin niun confiansa mas den minister Glenbert Croes su manera di maneha, su proceduranan, su falta di transparencia y otro puntonan.

“Nos a splica hopi cla cu nos ta retira nos confiansa den su persona como minister pa guia procesonan pa pais Aruba y consecuentemente nos lo vota sosten pa cu e mocion cu nos mes a entrega,” el a subraya.

Pa loke ta e mocion di fraccionnan ACCION21 y RAIZ, el a splica cu na e manera cu e mocion ta skirbi y con e ehecucion mester ta, Lopez-Tromp a ratifica cu nan no tin confiansa pa esaki sucede den minister Croes su man.

“Un proceso manera esaki ta importante pa pais Aruba, pero nos a bisa caba cu nos no ta confia e pa ehecuta e procesonan aki. Kiermen consistentemente nos no por sostene e pensamento aki y nos ta dicidi den e caso aki pa abstene di vota riba dje pasobra e ta esun cu lo mester ehecut’e,” el a enfatisa.

Pa loke ta votacion riba e mocion di desconfiansa, 12 parlamentario a vota contra, cual tabata fraccionnan di MEP y RAIZ y parlamentario independiente Ryçond Santos do Nacimento. Fraccion AVP y MAS y parlamentario independiente Gerlien Croes a vota na fabor di e mocion aki y fraccion ACCION 21 a abstene di vota.