Diaranson merdia a wordo conoci e resultado di un referendum, caminda sindicato FTA a haya un mayoria pa representa e trahadonan di The Mill Resort.

Na december 2018 e trahadonan a bay cu sindicato STA. Pero ultimo tempo e trahadonan di e resort a yega di confronta varios situacion. Un di nan relaciona cu e trabao di renobacion di e resort. Y aworaki e trahadonan ta preocupa cu e problemanan di salario y orario, entre otronan, cu e Covid crisis a trece cune.

Den e referendum aki 61 trahado tabatin derecho di voto y un grupo di 45 di nan a haci uzo di e derecho aki, y tur a vota pa sindicato FTA. Na final di e proceso democratico aki, Mediador di Gobierno, Anselmo Pontilius a haci un yamado tanto na e representante di gerencia como na esun di e sindicato, pa nan atende e kehonan di e trahadonan.

Aunke nos ta pasando den un pandemia y crisis, pero e ta haya cu no tin nada mas pio pa un empresa cu e trahadonan nan preocupacionnan den cual nan ta busca nan derecho, ya cu na final e trahadonan ta e curason di e compania. Tin dos referendum mas na caminda, y un di nan pidi pa SEPPA tin di haber cu e trahadonan di e compania ProTech cu mas cu shen trahado.

Representante di e resort a declara cu despues di e resultado nan lo bay sinta cu e representante di e sindicato. Di otro banda, Tyron Bremo kende ta encarga cu departamento di keho di FTA a bisa cu como sindicato nan ta hopi satisfecho cu e resultado pasobra e ta mustra cu e trahadonan ta uni y determina pa logra e meta.

Un preocupacion cu e trahado tin ta e cortamento ariba salario cu e compania kier haci, sin cu e trahadonan ta di acuerdo cu esaki. Tambe FTA kier termina e trabao di logra un contracto colectivo (CAO).

Bon Dia Aruba a trece dilanti cu no ta facil pa negosha CAO pa e trahadonan den e situacion dificil pa tur compania ta pasando aden actual. Bremo a bisa cu como sindicato nan ta consciente di esey, y cu e situacion realmente no ta bon. Sinembargo den e situacion actual loke nan ta percura como sindicato ta logra pa loke e trahadonan no bay atras y loke nan tin por keda. Pero tambe pa abuso contra e trahadonan no tuma luga. “E hecho cu nos ta den un situacion fastioso no ta haci cu ley no ta existi,” el a declara.

 

 

LEAVE A REPLY

Please enter your comment!
Please enter your name here