FTA: operador nobo di ex Aura Casino a keda rek tempo

E sindicalista y presidente di FTA, Hubert Dirksz a reacciona di biaha unabes cu a wordo conoci e sentencia di  Corte di Prome Instancia di Aruba contra di e caso cu sindicato FTA a entama. E veredicto a cay diamars.

E sindicato a cuminsa e caso den nomber di un grupo di trahado di ex Aura  Casino contra e operador nobo di dicho casino cu actualmente ta opera bou e nomber di Liv Casino. E sindicato aki no ta satisfecho cu e decision di Corte di Prome Instancia y teniendo na cuenta cu ta trata aki di un asunto di principio cu ta afecta no solamente e trahadonan en cuestion, pero tambe  e clase trahado en general aki na Aruba den futuro, lo apela e decision aki na Corte Comun di Husticia. Esaki Bon Dia Aruba a trece den su edicion brevemente ayera y awe sigui elabora riba e veredicto y tambe e motibonan di e sindicato. Ainda nos ta purbando di haya e e banda di e operado nobo tambe.

Demanda di FTA
Ta asina cu den e caso aki FTA a pidi Corte pa declara Liv Casino responsabel pa pago di e salario di e trahadonan pa e tempo cu nan a keda cas sin entrada cu ta casi un aña. Como tambe pa dicta cu e trahadonan aki ta den servicio di e operador nobo di acuerdo cu e articulo 1615dc di buki 7a di e Codigo Civil di Aruba,  cu ta stipula cu na momento cu e operacion di un empresa wordo traspasa di un entidad legal pa un otro, e entidad legal nobo ta keda responsabel pa e trahado. Esaki kiermen cu e empleadonan ta mantene tur nan beneficionan primario y secundario.

Segun FTA, durante e tratamento di e caso Liv Casino a alega primeramente cu e relacion di trabou di e empleadonan lo a wordo termina na momento cu e operador bieu di Aura Casino a cera su portanan. Ademas den su carta e lider sindical ta indica cu segun Liv Casino e echo cu e trahadonan a ricibi nan pago di cesantia lo ta indica cu no ta existi un relacion di trabou mas. Consecuentemente, segun Liv Casino-, no tabatin empleado mas na momento di a tuma over e operacionnan.

Sr. Dirksz a laga sa cu e ponencia aki di Liv Casino a wordo rechasa dor di Corte, pasobra e echo cu SVb a dicidi di paga cesantia na e empleadonan haciendo uzo di un fecha di terminacion ficticio, riba su mes no ta un prueba cu e relacion di trabou cu e trahadonan a wordo termina. Esaki pasobra ley na Aruba ta conoce un sistema cera pa locual ta regarda terminacion di un relacion di trabou, locual ta nifica cu ta unicamente riba e formanan menciona den e ley, un  relacion di  trabou por termina. Pago di cesantia door di SVb no ta un di esaki.

Traspaso di empresa
Pa loke ta trata e existencia di un “traspaso di empresa” Corte  den Prome Instancia a basa su opinion primordialmente riba e cantidad di tempo cu a pasa entre e momento cu Aura Casino  a cera (december 2015)  y e momento cu Liv Casino a habri (februari 2017). Mirando e tempo largo cu a pasa no por papia  (mas) di un traspaso segun Corte. Esaki ta un di e puntonan cu segun decisionnan di Corte Europeo di Husticia ta di importancia na momento di fiha si tin un “traspaso di empresa” of no. A considera tambe cu e tamaño do e casino a wordo reduci.

Di otro banda, segun Corte, ta un echo cu e clientela di e casino lo keda mescos y cu un cantidad di e empleadonan a sigui traha cu e casino. E indicado aki sinembargo, segun Corte, no ta suficiente pa yega na e conclusion cu tin un  “traspaso di  empresa” pa cual motibo a rechasa e peticion di FTA.

FTA ta convenci cu den e caso aki ta trata di un “traspaso di empresa”, unda cu ademas no por descarta cu deliberadamente di parti di e operador nobo a keda rek tempo pa asina crea e impresion cu no ta trata di un traspaso. E sindicato tambe ta di opinion cu, contrario na loke Corte den Prome Instancia a indica, e echo cu no a cumpli cu un di e indicadonan cu Corte Europeo di Husticia ta aplica pa un “traspaso di empresa”, no ta haci cu e traspaso ta bira imposibel. Di acuerdo cu e mesun Corte Europeo di Husticia, e lista di indicado no ta limitativo y cu circunstancianan individual ta hunga un rol importante na momento di determina si ta trata di traspaso. Hustamente  esaki ta locual lo pidi Corte di Apelacion pa evalua di nobo den e caso di e trahadonan di ex Aura Casino.