FTA ta lamenta cu no solamente den e fase di informacion cerca gobernador di Aruba, pero tambe den e fase cu formado di gobierno ta hibando, no a tene cuenta cu e gremio sindical.

Presidente di FTA, Hubert Dirksz ta declara na Bon Dia Aruba cu formado di gobierno ta reuniendo cu gremionan y lamentablemente no a reuni ainda cu sindicatonan. E mesun situacion a pasa cu gobernador di Aruba, despues cu e resultado di eleccion a wordo conoci, y gobernador a papia cu diferente gremio durante e proceso di informacion, pero no cu sindicato.

Mi ta compronde cu e formador no ta interesa pa reuni cu FTA,” e lider sindical ta bisa. Sr. Dirksz a aclaria cu textualmente e formador no a bisa esey. Pero esey ta loke ta wordo deduci despues cu e formado ta reuniendo cu varios gremio, pero no cu sindicato.

E ta haya cu FTA como e organisacion sindical mas grandi na Aruba ta wordo poni un banda, y formador no ta mustra interes pa reuni cu FTA. E no sa kico tin tras di e situacion aki. “E ta hopi straño! Mi mes no por sa.” Sinembargo presidente di FTA a laga sa cu nan mes lo bay purba tuma contact cu e formado di gobierno mes, pero nan ta lamenta e situacion aki.

El a bisa cu niun sindicato tampoco a wordo invita pa reuni cu gobernador di Aruba. E ta compronde cu e motibo tabata ta cu e sindicato no ta organisa. Sr. Dirksz a declara cu semper pa tur representacion dilanti pa ehempel di organonan di gobierno manera SER, colegio di apelacion di SBV, ILO, etc. semper e sindicato di mas grandi tin mas preferencia pa participa den cualkier reunion cu nan.

Den e caso aki no a tene cuenta cu e parti aki. Kiermen mi ta haya hopi straño cu e ta falta di un respet total pa e clase trahado pa haya sa e pensamento di e sindicatonan den e desaroyo di e pais”, asina presidente di FTA ta culmina su declaracion.