E problematica di adiccion ta grandi na Aruba y sigui crece cu añanan. Diferente instancia y fundacion ta dedica na e trabao di ofrece ayudo di rehabilitacion pa e personanan cu ta bringa cu adiccion. E fundacion Adult & Teen Challenge Aruba ta forma parti di e grupo cu ta ofrece ayudo. President di e fundacion, Ivone Simon Andrade a elabora ariba e trabaonan di e fundacion.

Adult & Teen Challenge ta un programa global y esaki ta existi pa 62 aña caba rond mundo. Fundacion Adult & Teen Challenge Aruba, cu tin 20 aña di existencia na Aruba, ta un centro di entrenamento vocacional pa personanan cu ta drenta un programa di rehabilitacion y asina ta wordo yuda y guia pa por reintegra back den e sociedad y ta personanan util pa sociedad.

Simon Andrade a splica cu for di cinco aña pasa e fundacion a cuminsa cu e vision y e mision di por lanta centronan di rehabilitacion y recuperacion pa personanan cu ta batayando cu e problema di adiccion, sea di droga, alcohol, pero tambe depresion y salud mental.

E programa di rehabilitacion y recuperacion ta un programa di 12 luna unda e persona cu ta dicidi di drenta e programa ta wordo yuda y guia cu lesnan specifico pa asina yuda nan cambia nan manera di pensa pa asina tambe nan por ta personanan util den Sociedad y sigur tambe pa nan ta bon hende pa famianan.

“Nos meta hopi importante sigur ta restauracion di famia. Mayoria biaha personanan cu ta batayando adiccion ta mayornan caba, sea mama of tata, y pa nos ta importante como fundacion cu ta yuda e personanan aki ta pa haci un restauracion back cu nan famia”, Simon Andrade a indica.

E fundacion tin proyectonan di expansion y un di nan cu a habri recientemente ta e tienda Supre Thrift Store. Na banda cu e personanan cu ta tuma e decision pa drenta e programa di fundacion ta haya e lesnan ariba con nan tin cu cambia nan actitud, nan ta haya tutoria cu ta duna diferente guia durante dia.

Simon Andrade a sigui splica cu e proyecto Super Thrift Store tin dos funcion. Un di su funcionnan ta pa siña e persona traha back y siña e norma y balornan den un dia practico. E persona ta bay y haci su practica normal manera den un area laboral mientras e ta ricibiendo guia ariba con ta e miho manera sigui e reglanan di bida y asina drenta back den sociedad.

“Ora e caba e programa cu e por bay busca un trabao ya e sa e norma y balornan, respet na autoridad y tur esaki ta parti di e programa”, Simon Andrade a agrega.

Alabes e centro aki ta e forma con e fundacion ta sostene su mes financieramente. E ta un tienda cu paña- y articulonan di segunda mano y tur locual ta eyden ta donacionnan di comunidad y asina comunidad ta contribui tambe pa yuda e fundacion paga nan gastonan operacional mensual.

E fundacion ta ofrece tambe un programa di dia caminda e persona ta pasa e dia den e programa, ta ricibi e guia y ayudo pa rehabilita y despues nan por regresa nan cas back cerca nan famia.

Simon Andrade a remarca cu nan tin diferente proyecto hopi grandi cu ta pasando. Aworaki e fundacion tin un centro di hende homber y un centro di hende muhe pero e capacidad ta hopi chikito. Pa medio di fondonan, y pa cu esaki nan ta conta cu e comunidad, comercio y tur cu tin curason cu kier yuda, nan ta bay reloca e centronan aki.

“E necesidad na Aruba ta hopi grandi y tur e centronan cu ta existi caba sa cu nunca ta suficiente pasobra bo mester un luga mas grandi. Nos tambe den aña 2023 y 2024 nos enfoke ta pa expande e centronan di ambos hende homber y hende muhe pa ricibi mas studiante posibel den nos programa”, el a señala.

Pa esaki, el a informa, nan mester mas fondo. Cada proyecto riba su mes lo tin un costo di alrededor di 450 mil florin, pues un total di 900 mil florin pa por reloca y expande e centro di homber y di muhe. Esey ta pa acomoda 12 persona den cada centro plus gastonan operacional. “Pa nos por logra esaki di berdad nos mester di e ayudo di comunidad”, el a enfatisa.

Fundacion Adult & Teen Challenge ta un fundacion non-profit, personanan cu ta desea di yuda por haci esaki di diferente manera. Por aloca fondonan directo ariba e cuenta di e fundacion of por yuda tambe door di hiba articulonan cu ya no ta usa mas, paña, sapato, articulonan di cas, mueble, articulonan electronico etc na e tienda y e fundacion ta bende esaki back na un prijs hopi economico.

Por hiba e donacionnan na e tienda, pero tambe hopi hende conoce e baki blauw cu tabata riba boulevard, pronto esaki lo regresa na su luga original pa asina comunidad por sigui haci nan donacionnan na e fundacion.

“E tienda aki nos no lo a logra sin e apoyo di e comunidad y e ta un proyecto di asina gran impacto, dus nos ta masha agradecido cu e comunidad di Aruba cu desde inicio a kere den e proyecto”, Simon Andrade a subraya.

Por ultimo el a agrega cu aworaki den e fase di expansion sigur nan lo tin mester di mas ayudo pa asina nan por sigui brinda e ayudo ey back na cada ser humano cu ta desea di wordo yuda y guia pa un transformacion positivo y asina Adult & Teen Challenge por yuda nan reintrega nan mes back tanto den nan famia como den e sociedad como personanan liber di adiccion y personanan productivo y cu ta bay ta di gran balor pa e sociedad.

“E proyecto di Super Thrift Store cu aworaki a reloca pa Certified Mall, ta un forma di economia circular y e ta sostenibel y mas importante ta cu e ta yuda cambia bidanan, dus su impacto den e comunidad ta sumamente grandi”, Simon Andrade a finalisa.