Dialuna mainta, Fundacion Alzheimer Aruba a duna un conferencia di prensa pa informa comunidad cu e siman di Alzheimer Teal Ribbon Awareness a cuminsa, unda cu e aña aki ta cumpli 20 aña di e celebracion aki.

Esaki ta pone enfasis riba e conscientisacion den comunidad riba kico ta e bida di un persona despues cu ta diagnostica cu Alzheimer. Melva Croes-Yanez presidente di e fundacion a splica tocante e desaroyonan cu nan ta bin enfrentando y cu pandemia di Covid-19 a trece cune hopi mas trabao di loke nan a pensa.

Tambe el a trece dilanti e desafio cu tin riba e parti di intrankilidad di hopi di nan cliente cu a tuma contacto cu nan durante y despues di pandemia. Algun biaha e hendenan ta bay cerca nan cu e storia cu nan tin demencia y Alzheimer, locual e ta considera hopi preocupante, pa motibo cu por ripara cu e hendenan mes no sa kico ta pasando sin por haya un claridad, sin cu por sa kico ta spera pa e persona cu ta wordo diagnostica cu e condicion aki. “E por bira mas depresivo y cu mas incertidumbre”, ta p’esey cu e siman aki tambe nan kier para un rato riba e anochi di lectura y di cine cu nan a organisa, pa asina comunidad por compronde miho kico ta sigui despues cu un persona ta wordo diagnostica.

Croes-Yanez a declara cu na Aruba, na momento cu un hende ta drenta den casnan di cuido “eynan ta parce cu su bida ta caba y cu famia ta bisa cu no por haci nada mas. Tin algun di nan a cu a muri lunanan despues, unda bo ta haya cu trato y discriminacion cu e hende aki ta haya ora cu bo ta padece un condicion neuro-cognitivo como Alzheimer. E bida despues di e diagnostico ta hopi importante y mester conscientisa comunidad mas y mas riba e parti aki”, el a bisa.

Esaki ta merece hopi atencion – manera el a sigura – pa motibo cu hende grandi y tambe esnan mas hoben cu por ta sufriendo un of otro condicion di e tipo aki, ta den un situacion cu nan mes no sa kico ta pasando cu nan. E personanan den ambiente tampoco sa kico pa haci, unda por haya un bruhamento. Segun el a expresa, hopi biaha abuso tambe ta tuma luga pa motibo cu hende ta perde pasenshi, cu ademas tambe por haya un cantidad di remedi pa tene e persona aki trankilo.

“Esey no ta un calidad di bida, p’esey mester conscientisa comunidad cu informacion valioso pasobra no tin cura y tampoco lo tin, segun ta parce”, el a sigura.

Tambe el a bisa cu tin un tendencia di yama tur cos demencia of Alzheimer, loke ta trece hopi confusion y por trece como consecuencia cu e cuidador di un persona cu ta sufri di algun di e condicion ey por comete cierto foutnan. Comunidad mester cuminsa pa ta mas alerta y haya informacion aki, “pasobra si e cos aki toca na nos porta, nos por sa con nos kier pa wordo cuida. Mas cu 50 miyon persona na mundo ta sufriendo di un of otro forma di trastorno neuro-cognitivo cu antes tabata yama demencia”, Croes-Yanes a expresa.

Ademas, e siman aki nan tin un agenda di actividadnan, unda nan ta bay publica cierto informacion tocante cifranan na nivel mundial pa por informa comunidad tocante estado di con e situacion ta. Pa awe 21 di september, Dia Mundial di Alzheimer, nan tin un anochi di cine na Cas di Cultura 7or di anochi. Dia 22 nan lo tin un anochi di lectura na centro di bario di Savaneta 7or di anochi. Diasabra tambe 7or di anochi ta bay tin un misa na Sagrado Curason di Savaneta.

Di igual manera, Croes-Yanez a comenta cu e parti di salud mental rond di mundo ta un problema y Aruba ta un pais chikito. “Si nos tur por cuminsa acumula nos forsanan hunto, nos no tin mester di tin problema. Na Aruba hopi biaha tin profesionalnan cu no kier traha cu otronan of nan no por, pero nos hendenan merece miho y nos hendenan merece di un cuido miho, no un cuido unda seguridad di nos hendenan ta wordo cuestiona. Seguridad di e pashentnan cu un of otro condicion di tipo Alzheimer hopi biaha ta laga di desea y tambe ta core peliger” Croes-Yanez a enfatisa.

Pa e motibo aki e ta considera cu tur esnan riba 65 aña mester uni hunto pa cuminsa pensa riba nan siguridad y con pa termina e bida aki di un manera cu calidad halto y no manera cu e ta aworaki cu manera el a sigura, ora un persona ta yega na un cierto edad e no ta sirbi mas.