Fundacion Artistar, ‘artistanan cu amor pa arte’, ta treciendo, pa di 3 aña consecutivo, un actividad. Bertha Wolff, presidente di e fundacion, a splica tocante e actividad cu e fundacion ta organisando pa siguiente luna.

E tres fechanan di e festival ta dia 15 di juni, 14 di juli y 16 di augustus. Pa esun di 15 di juni ta preparando un festival cu concierto pa ‘homenahe dedica na nos tata’. Wolff ta splica cu ta importante pa duna tata un bon regalo. E biaha aki e concierto ta encera canto, baile, teatro y musica.

E ta expresa cu festival asina mester mira mas frecuente riba escenario. E dia ey, nan lo wordo compaña pa mariachi ‘Perla di Aruba’, cu lo compaña 30 cantante den club China, situa riba e caya patras di Super Food.

Nan ta invita pueblo di Aruba pa uni cu nan. “Nos meta ta grandi pa comunidad, e ta pa nos mantene nos folklore, nos musica, tur loke ta encera cultura, y mas principalmente pa yega na nos mucha y hobennan, pasobra nan mester haya les di musica, pa nan por dedica mas na arte.”

E ta remarca cu formacion di hoben y comunidad mester bay tambe cu arte, agregando cu un di e problema grandi cu Aruba tin, ta cu no tin musico suficiente. Anto esunnan cu t’ey, ta birando grandi, y mester produci musico na Aruba, ‘pa mantene locual ta di nos’.

Fundacion Artistar lo sigui traha den e direccion aki, pasobra nan ta pensa ‘cu aki poco aña no lo tin cultura mas’. “Nos hobennan ta bou influencia di musica cu no ta di nos. Naturalmente nan mag gust’e, pero nan tin cu stima di nos prome. P’esey ta motibo cu nos a pone meta fuerte nos dilanti”, Wolff ta splica.

Wolff ta splica cu tin grupo di boluntario cu ta traha hunto, cu interes pa uni, sigui crece den nan meta y trabou cu ta eherciendo. Nan kier un comunidad sano den futuro pa esunnan hoben y chikito. Tambe ta expresa cu mayor ta responsabel pa duna ehempel, mescos cu scolnan.

“Na scol no tin les di musica. Tabatin instituto, pero no tabatin continuidad y nada pa reemplasa. Mester tin mas grupo, persona y musico pa cuminsa tuma esaki na serio. E gana pa duna un empuhe den comunidad ta bin parti di e fundacion, cultura mester wordo manteni”, Wolff a expresa.

El a comparti tocante actividad reciente di Fundacion Lanta Papiamento, y e programa di 10 aña di existencia, unda nan a ripara poco interes den comunidad. E ta remarca cu artista a presenta, arte di palabra y varios otro actividad, sinembargo, ‘publico no tabata grandi den e actividad aki’.

Wolff ta bisa cu esey ta causa un sentimento di dolor, pa motibo cu ta duna mas atencion na locual ta stranhero cu locual ta local. Sinembargo, Wolff a bisa cu ta invita comunidad pa atende dia 15 di juni pa actividad di bon show y cushina, ‘musica ta bay ta tremendo’.

E carchi pa evento ta 25 florin, y lo bay pa e fundacion cu ta haci uzo di dje pa dedica na muchanan di Aruba. “Compronde e mensahe aki, y cu cada florin ta bay pa nos hobennan”, Wolff a finalisa bisando.

 

 

LEAVE A REPLY

Please enter your comment!
Please enter your name here