Asina a duna di conoce Yamila Hoevertsz-Kock, presidente di Fundacion Hunga Teca, ken durante un entrevista cu Bon Dia Aruba a splica loke nan a haci durante e temporada di pandemia di Covid-19 y e prome lockdown cu a causa e ceramento di nan luga.

Hoevertsz a informa cu e fundacion no a sinta keto durante e temporada ey y nan a yuda Fundacion Pa Nos Comunidad (FPNC) bin cu dos campaña. Un di nan tabata trata di paketenan pa muchanan haci obra di man, pa motibo cu FPNC sa precies cua famia tin cuanto mucha di cualkier edad.

Pa esaki nan a acerca un compania local cu a duna e fundacion prijsnan special pa haci e paketenan. E ora ey nan a cuminsa yama of tuma contacto cu amigonan, hende conoci y famia pa asina nan por haya e placa cu tabatin mester pa cumpra mas di 300 pakete di obra di man.

Hoevertsz a bisa cu dos di e boluntario mas hoben di e fundacion, cu no tabata den grupo di riesgo y tabata traha conhuntamente cu FPNC, a parti e paketenan pa e famianan cu tabatin necesidad.

Di e otro campaña, el a conta cu ora scolnan a cera cu muchanan tabata hopi na cas, hopi mayor a perde nan trabao y nan no tabatin placa pa cumpra co’i hunga pa muchanan. Igualmente nan a tuma contacto cu famia, amigonan of hende conoci pa puntra nan si nan tabatin cos di hunga den bon condicion, pa duna esey como donacion.

Na un mall conoci, fundacion Hunga Teca a coloca algun caha pafo y asina personanan cu kier a yuda laga e co’i hunga, cu despues e boluntarionan a pasa busca nan pa haci esakinan limpi, haci e mesun proceso cu FPNC pa parti co’i hunga pa famianan por haci uso di nan.

“Den e prome lockdown e hende a coopera cu nos masha hopi mes, tabata algo increibel” Hoevertsz a sigura.

Di mesun manera, el a recorda cu aña pasa nan a haya un donacion di tablet door di Fundacion Kiwanis Palm Beach y esey a yuda hopi na e momento cu algun mucha no tabatin hermentnan pa haci nan les online na cas. E ora ey, director di scol Santa Filomena a tuma contacto cu e fundacion pa nan por fia e tablet pa e muchanan y asina nan por sigui cu nan les online for di nan cas.

Hoevertsz a señala cu Fundacion Hunga Teca tin tres siman habri caba na e mesun luga YMCA na San Nicolas, pero cu nan a cambia e concepto di orario. Personanan interesa pa bishita e luga sin afspraak, por acerca nan diahuebs atardi desde 3.30 te cu 5.30, manteniendo e reglanan sanitario di DVG den e cual personanan y muchanan tin cu bisti nan tapaboca.

Pa traha un afspraak pa dialuna, diaranson of diabierna, hendenan por comunica na number di telefon 566.5011, 733.5505 of 594.3334; e motibo di esaki ta pa e luga no keda habri por nada na momento cu no tin hende pa atende.

Ademas, Hoevertsz a informa cu nan a crea un experimento cu ta trata di ‘muchanan ta bin cerca nos y nos ta bay cerca muchanan’. Di esaki el a sigura cu diaranson ultimo nan a reuni na Parke Curason cu algun co’i hunga y a duna algun informacion. “Nos a ripara cu muchanan cu tabat’ey tabata intriga pa haya sa kico tabata e otro weganan cu nos a trece”, el a afirma.

Hoevertsz a bisa cu tur delaster diaranson di luna nan lo ripiti e actividad aki na diferente luganan, esun cu muchanan ta frecuenta, unda lo splica muchanan y nan mayornan loke Hunga Teca ta y kico nan ta ofrece.

“Ta bon pa conoce e importancia di wega den desaroyo di mucha” Hoevertsz a expresa. Segun el a declara, ora un mucha ta hunga e ta desaroya su celebro, sesonan ta bira mas grandi y door di esey e por siña miho y tambe e por memorisa miho. Tambe a enfatisa cu ora e celebro ta crece su habilidad pa comunica y pa crea un vocabulario ta mas grandi, door di esey e ta capta un idioma mas lihe, vooral su idioma materno cu ta hopi importante y door di esey e por siña otro idiomanan mas facil.

Ademas, el a menciona cu ora muchanan ta hunga cu bais, core y haci otro actividadnan nan ta desaroya un salud fisico, pa motibo cu un di e problemanan mas grandi cu Aruba tin awor ta muchanan cu ta sufri di obesidad, sobrepeso y diabetes, cu nan ta sedentario for di mucha y esey tin consecuencianan pa nan salud, e ta algo hopi preocupante.