Fundacion Lanta Papiamento: Papiamento 22 aña idioma oficial na Aruba

Diaranson dia 21 di mei Aruba ta di fiesta, como cu nos ta celebra e echo historico cu Papiamento ta idioma oficial na Aruba ya pa 22 aña caba.

Despues di hopi discusion y investigacion Parlamento di Aruba a aproba e ley di Oficialisacion di Papiamento.

Esaki a habri caminda pa Papiamento por sigui desaroya manera debe ser y pa e por haya su posicion husto den tur area di comunidad.

Pero esey no a y no ta bay sin turbulencia. Tin hopi obstaculo ainda, por ehempel e realidad cu ainda Hulandes ta e idioma di mas importante den enseñansa y cu ainda ta husga nos alumnonan na nan dominio di Hulandes. Tin tambe e parti di ley cu ta limita uzo di Papiamento den husticia.

Un problema grandi ta cu ainda hopi hende no ta consciente di e balor di Papiamento y tin dificultad pa acepta e status nobo aki di Papiamento. Y francamente bisa, tin poco actividad den comunidad, por ehempel di banda di gobierno, pa conscientisa nos hendenan, pa duna nos hendenan e informacion necesario pa nan por haya un actitud positivo relaciona cu Papiamento. Aceptacion di nos idioma y bon uzo di Papiamento no ta bin di mes.

A pesar cu por bisa cu pueblo Arubiano stima su Papiamento, nos mester sigui lucha pa un reconocemento total.

Fundacion Lanta Papiamento (FLP), cu ta celebra 16 aña cu e ta activo, ta invita henter pueblo di Aruba pa bin celebra e logro historico di Oficialisacion di Papiamento. E celebracion aki ta tuma luga diaranson dia 21 di mei na Biblioteca Nacional den Madurostraat, di 6.00 or pa 9.00 or pm. No mester registra, ni inscribi. Sala ta habri pa tur hende for di 5.30 pm.

Señora Selvia Lumenier y Señora Carlos Croes lo declama poesia. Tin musica di Gian Giel y Johnny Scharbaay. Ademas lo tin charla presenta pa Señor Ramon Todd Dandaré Mag. Ling. y Dr. Joyce Pereira. E representantenan di Wikipedia Papiamento tambe lo ta presente pa duna splicacion. Y … lo tin algun sorpresa den e programa.

E anochi ta caba cu un brindis pa celebra y pa haya inspiracion pa sigui cu e lucha.

Fundacion Lanta Papiamento ta invita henter comunidad pa ta presente na e celebracion aki.

Departamento di Cultura Aruba: Nos identidad, nos orguyo

Awe 21 di mei, Aruba ta celebra un momento historico den su desaroyo cultural y nacional: e 22 aniversario di e oficialisacion di nos idioma Papiamento. Dia como awe, den aña 2003, Gobierno di Aruba a tuma un paso trascendental pa reconoce Papiamento como idioma oficial, banda di Hulandes. Un paso cu a formalisa loke nos pueblo semper a sinti: cu Papiamento ta nos alma, nos voz, nos herencia y nos union.

Di e momento cu e ley a drenta den vigor, Papiamento a logra un luga cu e merece den nos leynan. Pero su balor mas profundo ta biba den nos bida diario: den e manera cu nos ta papia, skirbi, canta, studia, y conta nos historia. Papiamento ta e idioma cu ta uni nos sin distincion di raza, religion, origen, ni generacion.

Departamento di Cultura Aruba (DCA) – como pilar pa promocion di expresion cultural y identidad nacional – ta reafirma su compromiso firme pa proteha, stimula y desaroya nos idioma nativo. DCA ta traha sin pausa pa duna Papiamento un rol central den tur actividad cultural, den e arte, den educacion y den comunicacion publico.

Nos ta haci un yama henter comunidad Arubano: mayornan, mucha, educadornan, comerciante y tur esnan cu a scoge Aruba como su cas, pa honra e idioma cu ta caracterisa nos pueblo. Papia Papiamento, skirbi den Papiamento, splica su balor pa nos mes y pa e generacionnan di mañan.

Papiamento no ta simplemente un instrumento di comunicacion. E ta simbolo di resistencia, di creatividad, di union nacional. Ta den su palabra cu nos ta canta nos himno, expresa nos fe, y mustra nos amor pa e isla cu nos yama cas.

Pabien Aruba, Papiamento, alma di Aruba! Laga nos sigui honra bo, stimula bo uzo, y proteha bo pa semper – pasobra bo ta e tesoro mas precioso di nos pueblo, nos raiz, nos voz, nos identidad.